Jowai: Ka World AIDS Day wa jooh kynmoo khlieh u snem hajrong ka thong wow pynsñiawthooh paidbah ya u khñiang kjut HIV, uwa man u khñiang kjut wa nangku kat nang lai i por haka imlang sahlang, ha Jowai leh da kynmoo warom ya kani ka sngi ha MCSWA, DIC, hei pynlai ka Jaiñtia Network For Positive People (JNP+) deiwa kyrchaan ka Meghalaya AIDS Control Society Shillong.
Hawa klam hajrong ka phang yong uni u snem wa ong Global Solidarity, Shared Responsibility, u B. Kharmalki, Secretary MSNP+, ong u wa toh i kamram yong i hi kam ki bru wa em HIV wei kyrni hei dih drugs wow em i bahkhlieh neibynta u yakhun ya u HIV deiwa dih tikna ya i dawai, wei wym hoi u pynpoor cha kiwon kiwon leh.
Chooh chooh khana u wa haka jylla Meghalaya ki bru wa yoh HIV kiwa da em pyrtuid wa tipmit (Register) hapoh ART em ki 5107 ngut, kiwa neh hei dih dawai em ki 2816, kiwa da yap 737 ngut, ki wym bien u dih dawai 37 ngut, katwa kiwa tam won toh kiwa da wiar heh nei thaw e sumaar; nalor ki 239 ngut ki khynnah wa yoh HIV.
“Kam ki bru wa im wa u HIV, i kamram yong i toh u khana cha kiwi wa i imlang i wa uni u khñiang, wym toh u tieñ de ha kani ka juk stad sayan wa katni”.
U Kharmalki ong haroh u wa ki bru wa dih tista hi yow dawai HIV du hapoh 6 bnai ym ye de ki wow pynpoor ya u HIV tangwa wym toh won u sangeh dih dawai.
Ka DSP Crime, WJH ka C. Lyngdoh e yaroh ko ya kiwa em ya uni u khñiang kjut neibhah man ki ka nongmuna ya kiwi kiwa em i jooh i man i long tangwa sarom won ki u wan chakhmat neibynta u yoh yarap.
Heiyatoh wa ki kynthai leh da kyntu ko yaki wow wan ki chakhmat la jia maad ki ya iwon iwon i chah lehbeiñ næ ñiawbeiñ wow pynsñiaw ki yei eh i khoo yong ki neibhah ka chnat pulit kynthai em ki wow yarap ya ki.
Kyntu joor ko leh wow man kitæ ki kynthai wow wanrah yei kylla, wym wow suki heh ya boi nei suki u nang joor i sih.
Neiliang ka J. Synnah, District Social Welfare Officer, WJH won da pynche ko hajrong ka Nasha Mukt Bharat Campaign kawa da mang daka sorkar bei lyngba ka Ministry of Social Justice and Empowerment, hajrong ka thong wow yakhun pynduna nei pynemkaam drugs. Heijooh i por da pynche ko leh yaki laad yarap waphær waphær wa ye u yoh naka chnat krehkaam yong ki.
Kiwi won wa e yei klam kynthup u R. Ksoo, Jaiñtia Network for Positive People, ka Dr. JN Shullai Director MCSWA, ka H. Challam kawa mihkhmat naka DCPU wa kiwi.
