Na ki 64,269 ngut kiwa yaleh ya ka Secondary School Leaving Certificate Examination (SSLC) Examination, 2021 ka MBOSE, kiwa lait namo kiwa Pass da em ki 52.91% kiwa man 34,003 ngut. Heiwa na kini kiwa Pass ha ki 6 Subject da em ki 24,840 ngut wa 9163 ngut kiwa Pass ha ki 5 Subject.
Waroh ki skur wa da yaleh ha kani ka Exam da em ki 630 tylli.
Ki khynnah chynrang wa man kam ki Schedule Tribe (ST) da em 25,955 ngut kiwa yaleh heiwa kiwa Pass ha ki 6 Subject da em ki 9043 ngut katwa kiwa Pass ha ki 5 Subject da em ki 3459 ngut, waroh dapoi 12,502 ngut iwa man 48.17% ka Pass Percentage. Ki khynnah kynthai ST kiwa yaleh da em ki 33,891 ngut heiwa da em 13,001 ngut kiwa Pass ha ki 6 Subject wa 5219 ngut kiwa Pass ha ki 5 Subject deilang dapoi 18,220 ngut kiwa Pass iwa man 53.76%.
Deiwa pait ha ki District, kiwa boon dooh kiwa yaleh toh kiwa na East Khasi Hills kiwa em 16,595 ngut katwa kiwa duna dooh toh ha South West Khasi Hills wa em 2214 ngut.
Deiwa chim ya ka Percentage won, ka East Jaiñtia Hills toh kawa heh dooh deiwa em ya ka Pass Percentage wa 85.09%, pynbood sa ka West Jaiñtia Hills 73.41% waka East Khasi Hills 71.97%. Kiwa duna dooh ka Pass Percentage toh ka South West Garo Hills 23.01%, South Garo Hills 27.50%, North Garo Hills 27.88%, West Garo Hills 34.63% wa ha East Garo Hills 35.10% iwa mut waroh ki District ka Garo Hills ym em wa poi 50% kiwa Pass.
Hawa nujor wa u snem 2020 ka Pass Percentage da em ko 50.31% heiwa ha uni u snem da ku cha ka 52.91 iwa duna won hawa nujor wa u snem 2017, 2018 wa 2019.
Ha ka thup ki khynnah wa poi chakhmat dooh namo ka Top 20 Merit List, ha uni u snem da yoh nyngkong da ka St. Thomas Higher Secondary School, Mairang iwa pynbood hei wa ar da ka Sawlyngdoh Higher Secondary School, Mowkaiaw katwa hei wa le da yoh ka St. Mary’s Higher Secondary School, Shillong deilang waka Sherwood School, Tura.
