Jowai: Ka yung krehkaam ka District Early Intervention Centre (DEIC) kawa em ha ka Civil Hospital warim ha Jowai ynne ka sngi da pynman ko ya ka “Child Health Screening for Congenital Heart Diseases (CHD)” namo ka sngi wow chem ya ki kjut wa yatoh wa u klongsnaam hapoh ka scheme Rashtriya Bal Swasthka Karyaqkram (RBSK).
Ka RBSK toh ka scheme ka sorkar pyrdi kawa thmu yow chem ya ki kjut ha ki khynnah wa boonjait wei ka CHD toh neibynta kiwa kjut klongsnaam kiwa em ha i rta wa nadooh wa dang kha hadooh wa em ki 18 snem chwa u poi i cha u pood wa joor i chitom.
Neiliang u DEIC Manager u Kyrmenlang Suchiang da pyntip wa ynne ka sngi da wan 164 ngut kiwa suba kjut klongsnaam na kylleiñ ka West Jaiñtia Hills heiwa ki Doctor ka Manipal Hospital Bangalore u Dr. Kishore Gangadhar, Cardiothoracic Surgeon wa kiwi kiwa kreh lang lang wa oo da wan sylli ki ya kiwa chitom wei da chem ki 53 ngut toh kiwa emkaam yei sumaar.
I sumaar toh iwa leh ha Manipal Hospital Bangalore wei man i iwa mynkna wei da su lut ya i bai lai bai wan, bai sah lait noh i bai baam wei ya kiwa chitom u emlang arngut kiwa wan lang wa ki wei ya ki leh ka lai ka wan, ka bai sah man ko wa mynkna wei daw synran leh ya ki da kiwa kreh ka DEIC.
I bai sumaar ya i kjut klongsnaam deiwa haap su man i chi lak tam.
Ya kiwa wan ynne ka sngi toh kiwa da chem ka Mobile Health Team (MHT) wa em ar tylli ha kawi pa kawi ka Block wei hapoh kani ka MHT da em uwi namo ka wi ka Doctor Ayush, Pharmacist, wa ka Staff Nurse kiwa lai cha ki skur wa cha ki Anganwadi Center yow chem ya ki khynnah wa kjut klongsnaam.
Discussion about this post