Kam chibynta yong ka Pan India Legal Awareness and Outreach Programme “Azadi Ka Amrit Mohotsav” hapoh ka National Legal Services Authority (NLSA), ka District Legal Services Authority (DLSA), East Jaiñtia Hills District, Khliehriat chirup wa ki bor District da pynman ki ya ka Mega Camp cum Free Medical Camp ha Iapmala Presbyterian L.P. School, Iapmala, East Jaiñtia Hills District hei emlang u E. Kharmalki, DC ka District, ka C. Dkhar, District and Session Judge Cum Chairman DLSA, u S.S Syiemlieh, ADC wa kiwi kiwi.
U E. Kharmalki, hawa e yei klam da ong u wa emkaam wow pynkreh hok wei wow pynkreh deiwa khooid ya ki Scheme ki chnat waphær waphær neibynta ki paidbah wei ka Mega Camp toh kawi na ki rynsaan wow pynyoo rong ya ki Scheme wa da leh da ki chnat sorkar.
Heiyatoh wa i tika yada Covid -19 da kyntu u ya ki paidbah wow wan ki chaphrang wow chim ya ini i tika wow yada na kani ka kjut khlam.
Ka C. Dkhar, da pyntip ko wa ka NLSA, ka Meghalaya State Legal Services Authority (MSLSA) wa ka DLSA booh thong ki wow e yarap heiyatoh wa ki kaam wa yatoh wa ka aiñ katkam ki kyndon ka Article 39 ha ka riti synchaar ka ri.
Da pyntip ko leh wa da boon kam kini ki pynsñiawthooh wa da pynman da ka DLSA ha kylleiñ heiwa daw e yarap ya kiwa emkaam heiyatoh wa ka aiñ dei mynkna cha kiwa duna hei yoh i laa kiwa ymye wow su ya ka bai muktiar. Da pyntip ko leh wa ka DLSA da booddien bha ko ya i pynkrehkaam ya ki Scheme sorkar khnang wow yoh myntoi smat ki paidbah.
Ha kani ka sngi u DC da ekti u leh ya ki Work Order cha ka Iapmala VEC, Suchen Rim VEC wa ka Suchen Dhana VEC hapoh ka MGNREGA Scheme kwia haap hapoh ka Khliehriat C&RD Block katwa ka District and Session Judge da e ko ya ka PMAY-G Scheme cha ki 19 ngut na ka chnong Iapmala wa Lumshken.
Kiwi kiwa da klam ha kani ka sngi toh u N. Momin, Chief Judicial Magistrate Cum Secretary DLSA, ka B. Kharbithai, Judicial Magistrate First Class, u Dr. Dominic Shylla, DM&HO wa u S. Pdang, Public Prosecutor, East Jaiñtia Hills District, Khliehriat.
Ha kani ka sngi da em leh ka Mega Camp, heiwa ka yung krehkaam DM&HO da e sumaar mynkna ko, i e tika yada Covid-19, MHIS Registration wa kiwi kiwi heiwa da em 553 ngut kiwa yoh myntoi na ka Health Camp wei 77 ngut toh kiwa yoh ya i tika yada COVID-19.
Da booh leh ya ki dukan wa ki thaw pynyoo rong yong SHG wa ki chnat krehkaam ka sorkar wa em hapoh ka District.
