U DHS (MI) ka jylla u Dr. A War da pyntip u wa hadooh 1 waje ynne ka sngi ka 26 tarik, kiwa dang yoh ya u COVID-19 da em ki 56 ngut hapoh Meghalaya heiwa ha East Khasi da em 37 ngut-BSF (23), ki bru paidbah (9) wa kiwi ki chnat chipai (4).
Kiwi kiwa dang yoh thymme toh na West Khasi 3 ngut, Ri Bhoi 9 ngut-ki bru paidbah (4) wa ki bru chipai (5), North Garo Hills (1), West Jaiñtia Hills (1) wa na East Jaiñtia Hills (5) ngut.
Waroh kiwa dang em ya uni u khñiang da em ki 562 ngut.
Waroh kiwa dang em ya uni u khñiang ha ki District man ki kamni ha wah:
East Khasi Hills-462 ngut heiwa ki BSF (270), kiwi ki chnat chipai (25) wa ki bru paidbah (167).
Ri Bhoi- 50
East Jaiñtia Hills-13
West Jaiñtia Hills-10
West Khasi Hills-3
South West Khasi Hills-0
West Garo Hills-15
South West Garo Hills-4
South Garo Hills-2
East Garo Hills-1
North Garo Hills-2
Kiwa chait ynne da em ki 41 ngut kiwa na East Khasi Hills, BSF (39), bru paidbah (2) iwa da poi waroh 135 ngut kiwa da chait, kiwa yap dang neh 5 ngut hi. Deiwa kheiñlang wa kiwa dang em ya uni u khñiang, da poi 702 ngut kiwa da dep yoh COVID-19 ha Meghalaya.
Kiwa yoh thymme na East Jaiñtia Hills toh 4 ngut kiwa yabi na kiwa yoh COVID-19 kiwa chem ini wa dap deiwa leh yaka Test ya ki bru paidbah (Random Testing) katwa kawi toh ka wakreh ha Pamrapaithlu PHC wei dang booddien yow chem neiwon yoh ko ya uni u khñiang.
Ha West Jaiñtia Hill wa dang yoh toh 1 wa liwan na Assam, na ki 3 ngut ha West Khasi Hills 1 toh wa liwan na Assam wa 2 ngut kiwa liwan na Delhi kiwa man leh ki pulit waroh le ngut.
Na ki 9 ngut kiwa dang yoh ha Ri Bhoi, 5 ngut toh ki bru chipai ha Rangmen, 3 ngut kiwa liwan na Assam wa 1 toh wa yang bru ha RP Chest Hospital, ha North Garo Hills 1 toh u wakreh ka MeECL wa liwan na Assam.
Ha East Khasi Hills kiwa dang yoh toh 4 ngut ki bru chipai kiwa dang liwan, 23 ngut ki bru BSF heiwa 2 ngut kiwa liwan (chwa 21 tarik uni u bnai) wa 21 ngut kiwa yabi hapoh ka BSF Campus Umpling, 1 toh u CRPF uwa liwan, katwa 9 ngut won toh 2 ngut kiwa liwan na Bihar wa 2 na Assam, 3 ngut kiwa yabi naka Nurse ka NEIGRIHMS kiwa na Marbisu. 1 toh wa yabi na kiwa yoh COVID-19 ha Mawpat wa 1 na Laitumkhrah.
U DHS da pyntip u leh wa ki chnong ki thaw toh kiwa yarap wow leh yaka booddien namo ka Contact Tracing wei da pyntip ki lada em kiwa suba.
Da pyntip u leh ya ki 21 ngut kiwa yoh ha Mawpat toh kiwa ym em chitom wei da em 2 ngut kiwa da rah cha Corona Care Centre, deiwa ong leh wa ha Mawpat daw hap bichaar bha lada ym ye de wow booddien wei daw ong wa da poor para wa chong chnong lane ka Community Spread.
Da pyntip u leh wa nadooh mynstep u sdang yaka Test ha ki Containment Zone wei daw sdang chwa na ki thaw wa chah ktah dooh kam ha Mawpat wei lada chem wa wa ym em yoh ya uni u khñiang daw pynlait noh yaki.
Da pyntip u leh wa ki chipai da leh hi ki para ki wei da phah yaki nongmuna cha ka NEIGRIHMS
Da pynche u leh cha ki paidbah wa lada wan ki wakreh ka 108, ym em mut wa em wa yoh COVID-19 wei lai ki leh wow leh yaki Test wei wow pynbna kulmar wa em wa yoh COVID-19 toh iwa bakla katwa ym pu em pynbna pyntikna da ka chnat i chait i khiah.
