U DHS(MI) ka jylla u Dr. A. War da pyntip u wa hadooh 1 waje ynne i sngi ka 21 tarik, kiwa dang yoh COVID-19 hapoh Meghalaya da em ki 57 ngut wa 19 ngut kiwa chait.
Na kiwa dang yoh, 33 ngut toh kiwa na East Khasi Hills (31 ki bru paidbah wa 2 ngut ki bru chipai), West Khasi Hills 17 ngut ki bru paidbah, West Garo Hills 3 ngut ki BSF, Ri Bhoi 1, West Jaiñtia Hills 1 wa ha East Garo Hills 2 ngut.
Na kiwa dang chait ha West Khasi Hills da em 2 ngut ki bru paidbah, West Garo Hills 1 bru paidbah, Ri Bhoi 10 ngut (9 ngut ki bru chipai wa 1 bru paidbah), West Jaiñtia Hills 1, East Khasi Hills 5 ngut (BSF-4 wa 1 bru paidbah).
Na ki bru paidbah wa dang yoh thymme ha East Khasi Hills kiwa em 31 ngut, 7 ngut toh na Khliehiew, 12 ngut na Motphran, 8 Anjalee, 1 na PB, 1 na Ganesh Das Hospital wa chah sumaar, 1 wa liwan na baar jylla wa 1 ha Woodland Hospital wa chah sumaar.
Ha West Jaiñtia Hills toh wa chah sumaar ha RP Chest Hospital, ha Ri Bhoi 1 toh wa liwan na baar jylla. Ha West Khasi Hills toh 17 ngut kiwa chem deiwa Test paidbah ha Shallang. Ha East Garo Hills toh 2 ngut kiwa liwan na baar jylla.
Heiyatoh wa i Test paidbah ha Shallang, u DHS da pyntip u wa da dep wow Test ya 176 ngut wei du haka 20 tarik da em 14 ngut kiwa yoh COVID-19. Hadooh 3 waje ynne ka sngi da em 10 ngut kiwa man Positive kiwa ym pu em kheiñlang, ha Riangdo da em 2 ngut kiwa yoh COVID-19 hadooh ka 19 tarik.
Heiyatoh wa kiwa yoh COVID-19 na Khliehiew, u DHS da ong u wa katkam wa sñiawthooh wa neidaw wa boon ki kari wa wan pynhaap mar ha Khliehïew heiwa kiwa yah kari leh em kiwa kiwa wan na Assam ye wow man wa da yabi na kini neidaw wym bood ya ki kyndon wa da booh wei kattu da hap khang ya kiwa em heitu.
Kiwa dang em COVID-19 ha ki District man ki kamni ha wah:
East Khasi Hills-599 (BSF-104, kiwi ki chnat chipai-119, bru paidbah-376)
West Khasi Hills-18
South West Khasi Hills-1
Ri Bhoi-92
West Jaiñtia Hills-5
East Jaiñtia Hills-8
West Garo Hills-221
South West Garo Hills-4
South Garo Hills-2
East Garo Hills-3
North Garo Hills-10
Waroh kiwa dang em ya uni u khñiang da em ki 963 ngut, kiwa chait 749 ngut wa 6 ngut kiwa yap iwa da poi waroh 1,718 ngut kiwa da dep yoh COVID-19 ha Meghalaya.
Ki nongmuna wa da dep pha Test da em ki waroh 70413 tylli, kiwa ym em chah ktah da em ki 68356 tylli wei dang yang yaka Result ki 380 tylli.
