Heiyatoh wa i yoh kjut ki khynnah skur nei baam wa da sih da man bih iwa da jia ha ka Hostel ka skur wa em ha Karnataka heiwa ar ngut ki khynnah na Meghalaya da dooh ki yei mynsien na ki 24 ngut kiwa da poi Hospital, da kem 6 ngut kattu kiwa emkti ha ini i jia.
Kam wow pynkynmoo wa kani ka skur toh kawa em ha Mandya District ka Karnataka heiwa ka sorkar Meghalaya da phah ko leh ki bru yong ka cha kani ka thaw.
Kini ki khynnah da baam ki yei baam khawai wa da pynkhreh kam chibynta ka Holi ha ka 14 tarik heiwa yeiwa sah i baam da lai e cha ki ha ka 15 tarik iwa da baam ki hapoh Hostel heiwa waroh kiwa baam yeini i baam dapoi Hospital ki.
Kiwa da chah kem kynthup ki nadooh u tre ka Hotel wa chet yeini i baam, uwa chet yei baam, kiwa pynlai ya ka Hostel kani ka skur kawa da pynkrehkaam khlem da yoh bor.
Kini ki khynnah toh kiwa lai Class V hadooh Class VIII wei ka sorkar da thmu ko wow wanrah biang ki chapoh ka Meghalaya deiwa pynchong skur ki yow lait u sepai uni u snem lai puræ ki.
Kini ki khynnah kamwa man kattæ dang em ki hapoh ka Mandya Institute of Medical Sciences heiwa dang em sa uwi wa em hapoh ka ICU katwa kiwi ki ar ngut da yoh ki wow mih napoh ka ICU.
Discussion about this post