Ka sorkar pyrdi da chimkhia ko hadien wa sdang mih pyrthai u khñiang kjut COVID-19 wa thymme (uwa da kylla namo Mutate) uwa da sdang ha United Kingdom (UK) ya uwa da tip kam u SARS- CoV-2 namo UK Variant wei da yaleh ko wow chemdien wei wow khang yei poor uni u khñiang thymme.
Neiliang ka sorkar da pynsangeh ko ya ki lieñsuiñ wa wan na katai ka ri nadooh ka 23 tarik uni u bnai hadooh ka 31 tarik, da phah Test ko leh ya waroh kiwa wan na kani ka ri da ka RT-PCR.
Katkam ka kyrwoh naka Ministry of Health & Family Welfare, ka National Task Force (NTF) on COVID-19 da chong yalang ko ha ka 26 tarik uni u bnai wow pyrkhat kammon wow Test, u sumaar wei wow khang yei poor uni u knñiang deiwa booh leh ya ki Standard Operating Protocol ya waroh ki jylla wow bood ki.
Nadooh ka 25 Khonchonglad (Nov) hadooh ka 23 tarik uni u bnai da em 33,000 ngut kiwa wan chapoh ka ri na UK wei hadien wa leh ya ki Test da chem wa 114 ngut da yoh ki ya u COVID-19 wei ya kini ki nongmuna (Positive Samples) da phah cha ki 10 tylli ki Laboratory ka INSACOG (NIBMG Kolkata, ILS Bhubaneswar, NIV Pune, CCS Pune, CCMB Hyderabad, CDFD Hyderabad, InSTEM Bengaluru, NIMHANS Bengaluru, IGIB Delhi, NCDC Delhi) wow leh yeiwa puræ bniah (Genome Sequencing) ya ki.
Da chem wa 6 ngut kiwa wan na UK da yoh ki ya uni u khñiang COVID-19 uwa thymme (3 ha NIMHANS, Bengaluru, 2 ha CCMB, Hyderabad wa 1 ha NIV, Pune).
Waroh kini kiwa yoh ya uni u khñiang da khangkset (Isolation) ya ki jar jiar ha ki thaw sumaar sorkar wei ya kiwa yajan wa ki da phah chongkset (Quarantine) ya ki wei dang booddien leh ya kiwa lai wa wan kiwa da yajan wa ki.
Ya uni u COVID-19 thymme (UK Variant) hadooh katni da chem leh ya oo ha ki ri kam ka Denmark, Netherlands, Australia, Italy, Sweden, France, Spain, Switzerland, Germany, Canada, Japan, Lebanon wa ha Singapore.
