6 ngut kiwa na Manipur da ye ki u pyndep ya ka Civil Services Examination, 2020 wa pynman da ka Union Public Service Commission (UPSC), kawa da pybna yei pyrtuid kiwa da chah jied ynnin ka sngi Thohdieñ.
Waroh da em 761 ngut kiwa da chah jied wow em hapoh ka Indian Administrative Service (IAS), Indian Foreign Service (IFS), Indian Police Service (IPS) wa ka Central Services, Group ‘A’ wa Group ‘B’.
Ki 6 ngut kiwa da chah jied na Manipur toh u Parikshit Thoudam (All India Ranking 60), ka Waikhom Nydia Devi (AIR 180), u Heikrujam Prasanjeet (AIR 578), ka Kshetrimayum Deepi Chanu (AIR 621), ka Hatchinghoi Haokip (AIR 673) wa u Lourembam Nelson Mangangcha (AIR 757).
U Parikshit Thoudam (AIR 60) da dep u wow yaleh chisein ha u 2019 wei da yoh u ya ka 373th Rank.
Ka Waikhom Nydia Devi (AIR 180) toh kawa lai puræ ha ka Padma Ratna English School, Kakching hadooh ka Class X wei da man ko leh kam kawa yoh nyngkong hapoh ka jylla Manipur ha ka HSLCE-2009. U pa ka Waikhom toh uwa jooh ya hari ka chnat i chait i khiah katwa ka bei ko toh ka Nurse ha kani ka jooh hi ka chnat.
U pa ka Kshetrimayum Deepi Chanu toh u Group Captain wa da chong ngiah ka Indian Air Force wei katni toh u Captain ka Air Indigo.
Kam wow pynkynmoo heini wa ya ka Main Exam da pynman ha u Duiyatra (Jan) uni u snem, katwa ya ka Personality Test da pynman ha u Naisaphra-Naikhynde uni u snem.
Ka UPSC da pynbna ko ya ka Final Result ka Civil Services Examination, 2020 deiwa pyntip wa na ki 761 ngut kiwa chah jied, 545 ngut toh ki chynrang wa 216 ngut ki kynthai kiwa da tyrwa yei pyrtuid wow thung kreh katwa ki 151 ngut toh ki wym pu em da pynbna pura.
U Shubham Kumar toh uwa da yoh nyngkong ha waroh kawi ka ri, hei wa ar da yoh ka Jagrati Awasthi wei hei wa le da yoh ka Ankita Jain.
U Kumar toh uwa da pyndep ya ka Bachelor of Technology (Civil Engineering) na IIT Bombay, wei da yaleh u ya ka Exam da ka Anthropology kam ka Optional Subject.
Ka Awasthi da chim ko ya ka Sociology kam ka Optional Subject. Da pyndep ko ya ka B.Tech (Electrical Engineering) na Maulana Azad National Institute of Technology (MANIT), Bhopal.
Na ki 25 ngut kiwa da poi chakhmat dooh, 13 ngut toh ki chynrang wa 12 ngut ki kynthai. Na kiwa chah jied da em leh 25 ngut kiwa em hei duna hei doh i pran (7 ngut toh kiwa duna ha ki kjat ki kti, 4 ngut kiwa duna hei bor khmat, 10 ngut kiwa duna hei bor chkor wa 4 ngut kiwa em boon jait ki duna).
Na kiwa chah jied, 263 ngut toh kiwa na ki General Category, 86 ngut na kiwa duna hei yoh i la namo ki Economically Weaker Section (EWS), 220 ngut ki Other Backward Classes (OBC), 122 ngut ki Scheduled Caste (SC) wa 61 ngut ki Scheduled Tribes.
Da em 10,40,060 kiwa da thap pyrtuid wow yaleh heiwa na kini da em 4,82,770 ngut kiwa da wan wow yaleh.
Na kini da jied ya 10,564 ngut kiwa lait ya ka Written (Main) Examination kawa da pynman ha u Duyatra 2021.
Na kini won da jied ya ki 2,053 ngut ki wow yaleh ya ka Personality Test (Interview).
Na Meghalaya kawa khaddooh dooh wa yoh u man IAS toh ka DC ka East Khasi Hills wa katni ka Isawanda Laloo kawa man kam chibynta ka 2013 Batch.
