Shillong: Ki nongmihkhmat yong ki kattu katni ki bru tre ri (tribes) wa ki jaitbru na kylleiñ ka pyrthai daw wan yachimbynta ki ha ka Terra Madre deiwa yakylliang ya pachat jingmut ki hapyrdi yong ki ya ka riti dustur, i rukom im, i rukom baam rukom dih, wei tip yong ki chaphang ka rymaw. Ya kani ka yachem da pynman da ka North East Slow Food and Agrobiodiversity Society (NESFAS) heiwa da bahkhlieh yei lut i sep da ka Sorkar Meghalaya.
Kini ki bru daw em bynta ki ha ka Indigenous Terra Madre (ITM 2015), ka wow sdang nadooh ka 3 tarik hadooh 7 tarik u Khonchonglad 2015 ha Shillong wei daw pynkut ya ka ha ka Khloo Kyntang kawa em ha Mawphlang, East Khasi Hills.
Ki nongmihkhmat na kylleiñ ka pyrthai daw yachim bynta ki ha kani ka yachem kam na Brazil, Ethiopia, Kenya, Mexico, Siberia and Central Asia, Tanzania, Uganda, US wa kiwi kiwi.
Heijooh i por kini ki nongmihkhmat daw wan hiar ki cha ka chnong Moosakhia ka wa em ha Amlarem Sub-Division ha pyrdi ki sngi wa pynman ya kani ka yachemlang.
Ha ka sngi khaddooh daw pynman ya ka food festival heiwow dai ya ki baam kiwa ha rukom na ki thain mihsngi ka ri India, wa ki baam wa daw dai ka International Terra Madre Kitchen wa ki Slow Food Chef’s Alliance. Heijooh i por daw em leh ki baam Pnar kiwa daw pynkhreh da ki bru na Ri Loom Jaintia. Ha kani ka sngi da yooluti wow em hadooh 10,000 ngut ki bru wow wan cha ka chnong Mawphlang.
Discussion about this post