U Montri ka chnat Tourism ka jylla, u Paul Lyngdoh ynne ka sngi da ong u wa ka Tourism Policy ka jylla daw pynku ko yei yoh kaam yoh jaam ki khynroo khyllood ka jylla wei yei yoh i kot leh kamjooh.
Hawa klam ynne ka sngi hawa pynlait ya ki kari kamai da ki Innova Crysta wa em 16 tylli hapoh ka PRIME Tourism Vehicle Scheme cha kiwa da yaleh ya kani ka Scheme ki wow pynemkaam neibynta kiwa uiñke suwari, da ong u wa ha kini ki 5 snem wow wan da booh thong wow pynlait sa kamwa 500 tylli kini ki kari yow yoh kreh ki khon khynroo ka jylla.
Heijooh i por da khana u wa ya ka Ropeway Car na Lum Shyllong cha Laban daw sdang noh u chna ha uni u Khonchonglad (Nov) wei daw pynyoh kaam ko ya kamwa 6000 tam ha ka chi sngi wei ini daw pynu ko yei ye u yoh kreh wei daw pyndap ko yei yoh i kot ki bru. “Kam ka nongmuna, ka Shillong Ropeway Project du ha ka chi kynta u e kaam ko ya 600 ngut wei lada ha ka 10 kynta u emkaam 6000 ngut ki khon khynroo wei ini i pynmih kreh toh deiwa emkaam 6000 ngut ki khynroo khyllood wei ini i e kreh toh kawa heh bha najrong kiwi ki kaam kiwa dai chai, dai baam”, da ong u Paul.
“Hadooh katni da em 15 lak ngut kiwa uiñke suwari wa wan cha kani ka jylla wei ini toh i kylla ha i yoh i kot. Ki kaam sorkar toh kiwa duna bha neibhah du kajiak ye u e kreh ya ki khynroo khyllood”, da ong u.
Da ong u leh u wa ha chi snem kamwa 2000 tylli ki kreh sorkar wa lait wei kamwa 65,000 ngut ki khynroo khyllood kiwa thooh kreh man-u-snem wei ini man i iwa boon hadooh kattæ kattæ wei lada ym ye wow thooh laad daw chem chitom ki.
Heijooh i por da khana u wa ka sorkar daw pynkhreh ko ya ki laad ki luti yow pynbha yei lai i wan lyngba ka lieñsuiñ najrong ki thaw uiñke ha man ki thaw ka jylla.
