Kiwa dang yoh COVID-19 hapoh Meghalaya hadooh ynne 5 waje i janmiet ka 4 tarik da em ki 15 ngut katwa kiwa chait da em ki 66 ngut, katkam wa pyntip u DHS (MI) u Dr. A. War.
Na ki 15 ngut kiwa dang yoh, 9 ngut toh kiwa ha East Khasi Hills heiwa ki bru paidbah da em ki 5 ngut, ki BSF 2 ngut katwa na kiwi ki chnat chipai da em 2 ngut. Ha Ri Bhoi da em (1) wa ha West Garo Hills (5) kiwa dang yoh.
Ha East Khasi Hills na kiwa dang yoh, 2 ngut toh kiwa liwan na baar jylla, 1 wa chitom SARI wa na Umpling 2 ngut toh kiwa yachem wa ki yoh COVID-19 (High Risk Contact). Ha Ri Bhoi toh wa liwan na baar jylla. Ha West Garoh Hills, 3 ngut toh kiwa liwan na baar jylla wa 2 ngut kiwa yabi kiwa man leh ki High Risk Contact.
Na ki 66 ngut kiwa dang chait ynne ka sngi, 54 ngut toh ha East Khasi Hills kiwa 14 ngut ki bru paidbah, 39 ngut ki BSF wa 1 na kiwi ki chnat chipai, ha South West Garo Hills (4), Ri Bhoi (1) wa na West Garo Hills (7) iwa da poi waroh 330 ngut kiwa da dep chait.
Kiwa dang em COVID-19 hapoh ki District man ki kamni ha wah:
East Khasi Hills-473 heiwa ki BSF da em ki 189 ngut, ki bru paidbah 224 ngut wa 60 ngut na kiwi ki chnat chipai.
West Khasi Hills: 5
Ri Bhoi- 55
West Jaiñtia Hills: 16
East Jaiñtia Hills: 17
West Garo Hills: 14
South Garo Hills: 2
Waroh kiwa dang em ya uni u khñiang da em ki 582 ngut iwa hiar naka 626 ngut nadooh ynne i step.
Ki nongmuna kiwa da dep phah Test da em ki 38977 tylli, kiwa man Negative da em ki 37584 tylli wei dang yang yaka Result ki 476 ngut.
Kiwa da psiah chapoh ka jylla da em ki waroh 25218 ngut.
