Ka Secondary School Leaving Certificate (SSLC) Examination, 2024 wa pynman da ka Meghalaya Board of School Education (MBOSE) da sdang ya ka ynne deiwa em waroh 55,189 ngut kiwa wan thoh ya kani ka Exam hapoh ka jylla.
Na kini ki 55,189 ngut, da em 31,940 ngut ki kynthai wa 23,249 ngut ki chynrang.
Ki thaw thoh Exam waroh da em ki 159 tylli kiwa 68 tylli ha ki thaaiñ Garo wa 91 tylli ha ki thaaiñ Khasi wa Jaiñtia.
Waroh ki skur wa phah khynnah wow yaleh ya kani ka Exam da em ki 1868 tylli.
Ha West Jaiñtia Hills da em 16 ki thaw thoh Exam kiwa soo tylli ha Jowai, ar tylli ha Ummulong wa mar kawi ha Nongtalang, Mowkyndeng, Amlarem, Thangbuli, Shangpung, Mowkaiaw, Nangbah, Nartiang, Sohkha wa Barato.
Waroh kiwa thoh Exam ha West Jaiñtia Hills District da em ki 4,381 ngut wei na kini kiwa boon dooh kiwa lai thoh Exam toh ha Govt. Boys’ HS School, Jowai Exam Centre kiwa da em 647 ngut neitæ ha Marian Hills HS School, Jowai 475 ngut wa ha North Liberty HS School, Jowai 463 ngut.
Ha East Jaiñtia Hills won ki thaw thoh Exam da em ki 7 tylli kiwa ar tylli ha Khliehriat neitæ mar kawi ha Rymbai, Sutnga, Tuber, Umkiang wa Chiehruphi.
Waroh ha East Jaiñtia Hills da em 2,232 ngut kiwa da wan thoh Exam kiwa boon dooh ha Sein Jait Tuber Govt. Aided Secondary School, Tuberkmai Chnong Exam Centre kiwa em 643 ngut, neitæ ha Khliehriat Higher Secondary School 454 ngut wa ha Rymbai Presbyterian HS School wa em 342 ngut.
Discussion about this post