Kamwa 67 ngut ki bru wa kynthup ya 6 ngut ki kynthai da yap ki na i pynemkaam drugs ha Mizoram ha u 2020 kiwa boon dooh wa yap na i Heroin da khana ki bor sorkar.
Ka jylla ha u snem 2019 da em ko 55 ngut kiwa yap na i drugs.
“Waroh 67 ngut kiwa yap ynnin u snem toh kiwa da chah kdoh chah khoom hei drug Heroin. Heiwa ka sorkar jylla da leh ko chiboon yow pyndooh jait ya ini i kaam,” da khana u sahep ka Excise and Narcotics Department.
Da khana u leh wa kiwa boon ki drugs, khamtam i Heroin da wanrah tooh na Myanmar.
Ka Mizoram kawa em pood waka Myanmar wa Bangladesh, da yaleh thma ko pyrchah ya i drugs nadooh u snem 1984 hadien wa em wa yap nyngkong dooh na i Heroin hapoh ka jylla. Kani ka jylla da em ko ya u pood wa jrong 722 Km wa kini ki ar ri.
Hadooh u snem 2015, i Spasmo Proxyvon toh i daw wa boon dooh kiwa yap na i drugs hapoh ka jylla tangwa neidaw wa boon i poi i Heroin na Myanmar wa na kiwi ki jylla wa najan, da man i iwa boon dooh wa pynyap bru.
Katkam ka yukheiñ ka Excise and Narcotics Department da pynyoo wa 1,646 ngut ki bru wa da dep yap na i durgs ha Mizoram wa kynthup ya 193 ngut ki kynthai nadooh u snem 1984.
Kam chibynta wow khang yei poor ka khlam COVID-19, da khang ya u poor hapyrdi kini ki ar ri nadooh u Wisu (March) 2020 iwa da pynduna yei khayi tooh drugs wa i kiad, da ong u.
