Kat dang mih ki sngi ka khlam u khñiang kjut COVID-19 dang poor ko hapoh ka jylla wa ka Ri-loom Jaiñtia hi waroh kawi wei ini da pynsñiawkhia ko ya ka sorkar pyrdi heiwa ynnin da phah ko ya ki kattu katni ki jylla wa kynthup ya ka Meghalaya wow pynrkhiñ chooh chooh ya ki kyndon khnang wow khoom u kdoh ya i poor kani ka khlam.
Heiyatoh wa ini neiliang u Wyrta da yoh u wow yaklam wa u Dr. RS Thangkhiew uwa man u Medical Superintendent & Senior Consultant Gastroenterologist ha Supercare Hospital, Shillong heiwa da ong u wa kani ka khlam da baam ko ya kiwa boon ki mynsien khlem pynlait ya kiwon kiwon, deiwa kyntu u ya ki paidbah wa ki seiñ waphær waphær wa ymtoh wow kheiñstiñ ki ya kani ka khlam, da kdaw u wa du hapoh ka Supercare Hospital, Shillong nadooh u Naitung (April) 2021 hadooh u Naiynñiaw (July) 2021 da em 77 ngut kiwa da khlaad na kani ka khlam heiwa 68 ngut toh iwa ympu chim tika, 7 ngut kiwa da chim tika dang chisien wa 2 ngut won kiwa da chim tika waroh ar sien.
U Dr. Thangkhiew da kyrpaad u ya ki paidbah deiwa ong, “Ki paaid yong i ymtoh u khian, u duna ki na kani ka khlam, ymtoh wow yap ki du neidaw wa ap ki ya ki kattu katni ngut kiwa kwah wow leh pyrchah ya i bha i miat,” deiwa kyntu u ya ki paidbah wow wan ki chaphrang wow chim ya i tika khlem em i tieñ. Da ong u wa lada em ki iwon iwon i artatien, neiliang yong oo da pdiang u wow yaklam batai pynsñiawthooh ya ki wei wot wow chim ki ya i tika ha kani ka thaw sumaar heiwa oo u emlang u wa ki wow pyntikna wa ym em u phær ki hadien wa dep chim tika.
Da ong u wa boon ki bru kiwa yap toh neidaw wym em u chim ki yei tika wei dei mynsien wa sñiawkhia da ong u wa ye u man wa kani ka khlam ympu yap ko wei ye ko u wan ha ka sien wa le, wa soo kamtæ ter ter wei ini daw ktah bha i ya ki bru yong i, deiwa kdaw wa ki ar ngut ki bru kiwa khlaad ha Supercare Hospital wot hadien wa da yoh ya i tika la ar sien toh kiwa da em chitom da kiwi ki kjut kam ha u klong-snaam wa kiwi kiwi tangwa boon hi kiwa khlaad toh kiwa ympu dep chim tika.
Chooh chooh da kdaw u wa waroh ki bru ki ri ha pyrthai da chim ki ya ka tika heiwa ha Israel, ya ki bru wa chitom da e ki wot ya i tika la le sien leh heiwa wot oo leh dadep chim u la ar sien wei daw chim u ya i tika wa le sien ha u Thohlakhmi (Feb) yong u snem wow wan khnang wow ye u wow yada pynda-oo ya-oo hi wow ye u wow e i chakri ya ki paidbah waroh.
Da kitbok kitrwiang u leh ya ki paidbah heiwa u Blai u yada u ya ki waroh wei u Blai daw rap ye u wow yada lada ki bru hi wan ki chaphrang wow chim ya i tika.
