I jied ya kiwa mihkhmat MP cha Lok Sabha na Meghalaya da kut noh ko ynne ka sngi wei ki paidbah khamtam ki kyrtong wa e reiñ daw hap yang yooluti ki yaka 4 tarik u Naiynru kawa man ka sngi niaw Vote yow tip kiyi wa jop.
U Chief Electoral Officer (CEO) ka Meghalaya, u Dr. BDR Tiwari hawa yaklam wa ki laad pathai khubor ynne i janmiet da khana u wa i wan kiwa thap Vote hadooh i por 5:00 waje i janmiet dapoi ko 69.91% ha waroh ar tylli ki Parliamentary Constituency.
Da pyntip u wa ha Shillong kiwa thap Vote dapoi ki cha 70.26% katwa ha Tura i poi kiwa thap Vote toh 69.31% wei ini i yukheiñ ye i wow nang ku hadooh wa da yoh lut u kheiñ ya waroh.
Katkam i kheiñ iwa hadooh 5:00 waje ynne i janmiet, i poi kiwa thap Vote ha Shillong da ku na 65% ha u snem 2019, katwa ha Tura da hiar na ka 81% ha u snem 2019.
U CEO da khana u wa ka Election ha waroh kawi ka jylla toh kawa lai bait khlem iwon iwon i chah pynthut.
U Tiwari da khana u wa da em 13 tylli ki Strong Room yow booh ya ki EVM ha ka jylla waroh kawi, kawa kynthup 8 tylli neibynta ka Shillong PC wa 5 tylli neibynta ka Tura PC.
Ya ki Strong Room da booh ha waroh 12 tylli ki District wa ha Sohra Civil Sub-Division wei ya kini ki thaw da booh wow yang yada hadooh 3 rtap ki pulit ka CAPF hadooh ka sngi niaw Vote.
Hawa kylli, u CEO da pyntip u wa ka kyndon Model Code of Conduct u pteiñ ko wow krehkaam hadooh ka sngi niaw Vote wei hadooh wa da pynbna da kamwi da ka Election Commission of India.
Discussion about this post