Ka Meghalaya Board of School Education (MBOSE), ynne i step da pynbna ko ya ka Result ka HSSLC 2020 neibytna ka Science, Commerce wa Vocational Stream heiwa ka St. Anthony’s Higher Secondary School da leh bha ko wow yoh nyngkong ki khynnah yong ka haka thup ki 10 ngut haka Science wa Commerce Stream.
Haka Science Stream ka St. Anthony’s haka thup First Ten Position da em 10 ngut ki khynnah kiwa yoh nyngkong hadooh 10.
Haka Science Stream ha uni u snem waroh kiwa yaleh da em ki 3184 ngut heiwa kiwa Pass da em ki 72.24% (ynnin u snem 71.07%) heiwa ki chynrang wa Pass da em ki 77.76% (1091 ngut) katwa ki kynthai da em ki 71.93% (1261 ngut).
Naki District waroh kiwa boon dooh kiwa yaleh yaka HSSLC (Science Stream) toh ka East Khasi Hills kawa em 1904 ngut kiwa yaleh katwa kawa duna dooh toh ha South Garo Hills kawa em 10 ngut donhi.
Ka West Jaiñtia Hills kawa em 455 ngut kiwa yaleh, kiwa Pass da em ki 285 ngut iwa man 62.64% katwa ha East Jaiñtia Hills kawa em 42 ngut kiwa yaleh, kiwa Pass da em ki 27 ngut iwa man 64.29%.
Na kiwa Pass won waroh, 59.76% toh du kiwa na East Khasi Hills.
Haka Commerce Stream won, waroh kiwa yaleh da em ki 1684 ngut heiwa kiwa Pass da em ki 77.28%. Ki kynthai kiwa Pass da em ki 83.02% (665 ngut) katwa ki chynrang da em ki 77.16% (868 ngut).
Haka thup First Ten Position, ka St. Anthonys’ Higher Secondary da yoh nyngkong biang ko deiwa mih pyrtuid 8 ngut ki khynnah yong ka.
Ka East Khasi Hills toh kawa boon dooh kiwa yaleh yaka Commerce Stream kiwa em 1442 ngut katwa na South Garo wa na South West Garo ym em kiwa yaleh.
Na West Jaiñtia Hills kiwa yaleh da em ki 149 ngut heiwa da Pass 95 ngut iwa man 63.76% katwa ha East Jaiñtia Hills da em 67 ngut kiwa yaleh wa 60 ngut kiwa Pass iwa man 89.55%.
Na waroh kiwa Pass, kiwa boon dooh toh na East Khasi Hills kiwa em 59.75%.
