Ha ka Result ka Higher Secondary School Leaving Certificate (HSSLC), 2021 (Science Stream) wa da pynbna da ka MBOSE ynne ka 30 tarik, kiwa ye u lait namo kiwa Pass ya ka Exam da em ki 75.85% heiwa kiwa da yaleh ya kani ka Exam da em ki 3677 ngut katwa kiwa Pass da em ki 2789 ngut.
Na kiwa yaleh kiwa yoh First Division da em ki 1,194 ngut, kiwa yoh Second Division da em ki 1,404 ngut wa 28 ngut kiwa yoh Third Division.
Na waroh kiwa yaleh kiwa boon dooh toh kiwa em ha East Khasi Hills kiwa em 1782 ngut katwa kiwa Pass da em ki 1477 ngut. Kiwa duna dooh toh ha South Garo Hills kiwa em 10 ngut kiwa da Pass waroh 10 ngut.
Na West Jaiñtia kiwa yaleh da em ki 468 ngut heiwa kiwa Pass da em ki 311 ngut katwa na East Jaiñtia kiwa yaleh da em ki 36 ngut wei kiwa Pass da em ki 34 ngut.
Deiwa kheiñ da ka Percentage kiwa heh dooh toh ka South Garo Hills (100%), East Jaiñtia Hills (94.44%) wa ha South West Garo Hills (91.67%).
Ka Pass Percentage ha uni u snem da heh ko bar ya u snem 2020 (72.24%), 2019 (71.07%) wa ha u 2018 (74.58%).
Ha ka thup ki 10 ngut kiwa poi chakhmat dooh namo ka Meri List, ka St. Anthony’s Higher Secondary School, Shillong da yoh ko yei kyrdan wa nyngkong wa iwa ar katwa ya i wa le da yoh ka North Liberty Higher Secondary School, Jowai.
Ka St. Anthony’s leh da em ko 7 ngut ki khynnah yong ka kiwa mih pyrtuid hapoh ka Merit List.
Ki skur wa yoh 100% ka Pass Percentage da em ki 3 tylli wa kynthup ya ka Baghmara Govt. Higher Secondary School kawa em 8 ngut kiwa yaleh, ka Khliehriat Higher Secondary School kawa em 18 ngut kiwa yaleh wa ka Mawsynram Higher Secondary School kawa em 16 ngut kiwa yaleh.
