Ha ka yalang pynkut ya ka World No Tobacco Day hajrong ka phang “Tobacco – Threat to our Environment”, kawa da pynman ynnin ka sngi ha State Convention Centre, Shillong kawa pynman da ka National Health Mission, Meghalaya deiwa krehlang waka Sarva Shikska Abhiyan, Meghalaya.
U kongsan ha kani ka sngi, u D.P. Wahlang, Additional Chief Secretary, ka sorkar Meghalaya da yaroh u ya iwa da leh ha kini ki sngi chwa da ka chnat i chait i khiah waka chnat puræ puthi deilang waka Sambandh Health Foundation yow e wyrta pyrchah yei dih wei pynemkaam duma kamjooh yow pynsñiawthooh paidbah hajrong ini deiwa ya krehlang da palat 8,400 tylli ki skur.
Da pynkynmoo u haka yalang yei maa i dih duma kamjooh i baam duma ym du yei doh i pran kamjooh leh ya ka rymaw, kamtæ da kyntu u ya ki khynnah skur wow yait na ini wei wow man kam ka nongmuna ya kiwi wow bood ha yung ha sem, ha skur wa hapoh ka imlang sahlang waroh kawi.
Neiliang u Ram Kumar S, Additional Secretary, Health & Family Welfare Department wa Mission Director, National Health Mission, Meghalaya da kdaw u wa ka Meghalaya toh kawa boon dooh kiwa yoh Cancer ha bynta u ch’oh, ki snier, i khmut wei ini toh iwa sñiawkhia bha. Kamtæ da ban joor u yei emkaam wow phah pynyoo Doctor dei langær wei wow pynkylla noh yei rukom im.
Kamtæ da ong u wa i embynta lang ki skur ha ki jylla toh iwa emkaam bha wow pynsñiawthooh paidbah yei ktah u duma yei chait i khiah. Da khana u leh wa da yoh yei kyrchaan na ki waheh chnong, ki bei ki pa, ki MLA, kiwa yahkhmat niam hajrong kani ka thong deiwa pynrap lada ye u leh yeini man ka 6 bnai daw wanrah ko yei kylla hei rukom myllien ki bru u pynemkaam duma. U Kumar da yaroh u leh yaka chnat pulit kiwa da leh yei bynta yong ki yow pynkrehkaam ya ka aiñ COTPA kam chibynta kani ka World No Tobacco Day (WNTD) 2022 Campaign.
Ya ki kaam wa da leh kam chibynta ka World No Tobacco Day Campaign yong uni u snem da khana da ka Dr. Lana E. Lyngdoh Nongbri, Sr. Dental Surgeon, SNO, National Tobacco Control Programme kawa da pyntip wa ha ka jylla, ki District wa Block da em 8,405 tylli ki skur wa da chimbynta wei da pynman 7,677 sien ki lai paidbah namo Rally wa 7,464 tylli ki skur wa pynman ya ka Signature Campaign.
Ha kani ka sngi da saam leh ya ki khusnaam cha ki skur kiwa da jop ha ka Rally wa Signature Campaign wei da pynkup burom leh ya ki wakreh ka chnat Education yei kyrchaan yong ki wow pynkrehkaam ya ka Tobacco Free Education Institution (ToFEI).
