Shillong: Ka jylla Meghalaya da ku biang kiwa em ya u COVID-19 cha ka 36 ngut hadooh ynne, wei du ynne ka sngi da em hadooh 8 ngut kiwa yoh ya uni u khñiang, wa kynthup 1 na West Garo Hils, 1 na Ri-Bhoi wa 6 ngut na East Khasi Hills.
Hawa pyntip ya i yoh lum yukheiñ yong ka sorkar, u Montri wa pait ya i chait i khiah, u Alexander Laloo Hek da pyntip u wa kiwa yoh ya u COVID-19 ha East Khasi Hills toh 5 ngut na ka BSF, katwa 1 toh uwa lai khawai bia ha Greenwood Resort, Assam.
Da pyntip u wa hadooh kattæ, ka East Khasi Hills em ko 18 ngut kiwa dang em ya u COVID-19 (17 ngut ki BSF), ha Ri-Bhoi em ki 12 ngut wa kynthup ya 7 ngut ki chynrang wa 5 ngut ki kynthai, ha South West Garo Hills 2 ngut ki chynrang, West Garo Hills 3 ngut wa kynthup 2 ngut ki chynrang wa 1 ka kynthai, wa ha East Jaiñtia Hills 1 chynrang.
U Dr. Aman War uwa man u Director of Health Services ka jylla da pyntip u wa waroh ki 36 ngut kiwa em ya u khñiang COVID-19 ha ka jylla ym em ki yaki dak ki chin næ i chah ktah ya i chait i khiah, deiwa pynrap wa kiwa chong chnong ym toh u tieñ ki.
Hawa kylli, u Dr. Aman da pyntip u wa na ki 41 ngut kiwa lai cha ka khawai chong kurim ha Khanapara, Assam; ka chnat da dep ko wow Test 38 ngut wei da chem ym em chah ktah ki lait noh uwi. Da ong u leh wa heiyatoh wa ki chipai BSF, neiliang ka chnat da paan ko yei yukheiñ katwon ngut ki chipai kiwa em hapoh yong thaw wa em chipai ha Umpling wei da phah leh wa waroh toh u chong Quarantine wei ym toh wow mih cha lait lane cha pchem yung katwa kiwa sah cha baar kani ka thaw wa em ki chipai em ki 130 ngut.
Hawa kylli chooh chooh wa ka jylla ha ki 3 bnai wa da dep da ye ko wow yada na i poor u COVID-19, katwa ha kini ki 2 tayaw wa da dep da ku smat kiwa yoh ya uni u khñiang, u DHS da ong u wa ini i ku kiwa yoh COVID-19 toh wa em kiwa liwan na baar jylla, wa kynthup ya ki wakreh ki chnat ka sorkar pyrdi wa ki chipai kiwa lai chuti, katwa ha Ri-Bhoi da ong u wa i ku toh neidaw wa jan waka Assam.
