Ha ka Result ka Higher Secondary School Leaving Certificate (HSSLC) Examination, 2021 Commerce Stream wa pynmih ynne ka sngi da ka MBOSE, kiwa lait da em ki 80.93%. Waroh kiwa yaleh ya kani ka Exam da em ki 2,307 ngut heiwa kiwa lait namo kiwa Pass da em ki 1,867 ngut.
Na kini kiwa yaleh da em 867 ngut kiwa yoh First Division, 788 ngut kiwa yoh Second Division wa 30 ngut kiwa yoh Third Division.
Na kiwa yaleh kiwa boon toh kiwa ha East Khasi Hills kiwa em 1506 ngut heiwa ym em wa yaleh na South wa South West Garo Hills.
Deiwa kheiñ ya ka Pass Percentage, kawa heh dooh toh ha East Jaiñtia Hills kawa yoh 100% heiwa kiwa yaleh da em ki 57 ngut, ka East Khasi Hills 82.74% heiwa kiwa yaleh da em ki 1506 ngut waka West Khasi Hills 84.62% heiwa kiwa yaleh da em ki 78 ngut.
Ka Pass Percentage man ko leh kawa heh dooh ha uni u snem hawa nujor ha ki 4 snem wa da lai heiwa da tam leh 80%.
Heiyatoh wa kiwa poi chakhmat dooh namo ka Merit List, ha uni u snem da yoh nyngkong da u khynnah ka Laban Bengalee Boys’ Hr.Sec. School, Shillong, wa ar naka St. Anthony’s Higher Secondary School, Shillong hei wa le na Adventist Higher Secondary School, Thadlaskein. Ka St. Anthony’s da em ko leh 8 ngut ki khynnah yong ka kiwa da mih hapoh ka thup ka Merit List.
