Ka sorkar Meghalaya lyngba ka Personnel & Administrative Reforms (B) Department da pynmih ko ya ka Office Memorandum (OM) wa thymme ha ka 14 tarik uni u bnai hajrong ka Reservation Roster ka wow krehkaam noh chisyndon neibynta ka Reservation Policy yong ki Schedule Tribe wa Schedule Caste ka jylla.
Ka Reservation Roster toh kawa da kheiñ ya waroh ki kreh sorkar du neibynta kiwa dang sdang kreh thymme (Entry Level) wei kani ka Reservation Roster ym krehkaam ko hawa ku kyrdan ki wakreh wa i kyrriah ya kiwa kreh.
Ym krehkaam ko leh hawa thung kreh wa chipor iwa du hapoh 45 sngi, ya kiwa kreh kam ki Work Charge wa kiwa kreh deiwa ya soi Contract.
Hapoh kani ka Reservation Roster da booh leh ka bhah ya ki bru wa em i duna hei doh i pran (Persons with Disabilities) ya ki kaam wa ye ki u leh wei deiwa kheiñlang wa kini, hapoh ka Roster da em ko 204 Point tangwa khlem kini, ka Roster da em ko 100 Point heiwa ya kawi kawi ka Point da bhah chisien ya u Khasi-Jaiñtia, chisien ya u Garo, chisien ya ki Un-Reserved wa kiwi ki ST wa SC wa kiwa em sap ha ki yaleh Sport (Khasi Jaiñtia wa Garo) yow pyntikna wa ka bhah wa da booh hapoh ka Reservation Policy da yoh lut da waroh.
Kani ka Reservation Roster toh kawa kheiñ dei yong chi snem iwa mut wa lada hadien chi snem ki kreh wa da thung em ki 36 tylli daw sdang won ha u snem wa bood deiwa kheiñ nadooh 37 kiwa man leh kam ki Points.
Ini mut i wa kut wa pyndep yei thung kreh ha chi snem daw em ka Reservation Roster Register yow kheiñ katwon ngut ki Khasi-Jaiñtia, Garo wa kiwi ki ST wa SC kiwa da yoh kreh ha chi snem.
Ka Reservation Roster toh du yow pynkrehkaam ya ka Reservation Policy wei ym ktah ko manda kheiñ ya kiwa heh rta namo ka Seniority heiwa ya ka Seniority u kheiñ katkam ki kyndon wa da em katni.
Manda dep u thap kreh ha waroh ki Points ka Roster daw sdang biang ko nadooh wa sdang.
Ka chnat Personnel & AR(B) toh kawa da pynkupbor wow pait yei krehkaam ka Reservation Roster wa da pynkhreh da waroh ki Department/Heads of Department/District Heads/PSUs hawa lait kreh kiwa man kam ki Sanctioned Post.
Kamtæ waroh ki heh ki chnat sorkar hap ki wow pynbiang ya ka Reservation Roster yong ki chwa wow ye u pynbna ya ki kreh wa lait da ka MPSC, DSC lane da ka Central Recruitment Board kamjooh kiwon kiwon kiwa da em bor wow pynman yei yaleh kreh.
Hawa pynkhreh ya ka Reservation Roster toh u kheiñ chwa ya waroh kiwa da dep thung kreh nadooh nachwa katwa ye u kheiñ jngai dooh yow tip ha kawon ka Point da poi katni.
Lada jia wa em kiwa man kam ki ST kiwa yoh kreh dei bor stat yong ki hi, daw kheiñ ya ki hapoh ka Un-Reserved. Lada ki ST kiwa yoh kreh hapoh ka Reservation, daw kheiñ ya ki kam ki ST kamjooh leh ya kiwi ki ST wa SC kiwa yoh kreh hapoh ka Reservation.
Waroh ki chnat toh u booh bru ki wa em kyrdan kam u Under Secretary chaneiñ yow pdiang ya ki ujor lada em heiyatoh wa i pynkrehkaam ya ka Reservation Roster.
Heiyatoh won wa ki kreh hapoh ki District wa ki Sub-Division, u lai ko katkam ka O.M. No. PER.272/72/5 dated 18th December, 1972 kawa ong wa ymye wow bood da ka 40% ya ki Khasi-Jaiñtia, 40% ya ki Garo wa 5% won ya kiwi ki ST wa SC neibhah kini ki jait kreh toh ki wym ye u kyrriah namo ki Non-Transferable Post. Kamtæ kini ki kreh wa lait ha kawi ka District neibynta ki ST yong kiwa na kiwi ki District ym ye wow thap kreh da kiwa na kiwi ki District iwa daw wanrah yei eh wow pynkrehkaam.
Kamtæ ka sorkar da pyntip ko wa ya ki kreh wa lait hapoh ki District neidaw wa ki kreh toh ki wym ye u kyrriah ya kiwa yoh kreh cha kiwi ki District daw kheiñ yonglang bait 80% neibynta ki Garo, Khasi-Jaiñtia heithaw ka 40:40 wei daw em hi ka 5% ya kiwi won ki SC wa kiwi ki ST.
Ini mut i wa hawa jied ya kiwa yaleh kreh, toh u jied da kiwa chong chnong wa pura ka District hawa lait kreh. Ka nongmuna toh wa lada lait kini ki jait kreh ha ki District ka Garo, 80% u lai ko cha ki Garo lada ymem ki Khasi-Jaiñtia wa yaleh wei lada lait kreh ha ki District ka Khasi Hills wa Jaiñtia Hills won, 80% u lai ko cha ki Khasi-Jaiñtia lada ym em kiwa na Garo wa yaleh kreh.
Ya waroh kawi kani ka Office Memorandum ye phi u Download heini.
