Jowai: Ha ka 24 u Wisu ha u snem 1882 u Dr. Robert Koch da chem u ya u khniang wa pynman ya ka kjut Tuberculosis (TB), ka kjut kawa hadooh katni da chim ko hadooh 4,500 tylli ki mynsien man ka sngi ha waroh kawi ka pyrthai, kamtæ hadooh katni ya ka 24 tarik da tip kam ka World Tuberculosis Day.
Ha uni u snem ka phang yong kani ka sngi toh Wanted Leaders: For a TB-Free World iwa mut wow yoh ya kiwa yahkhmat kiwa ye u pyndooh jait ya ka kjut TB.
Ha Jowai ya kani ka World Tuberculosis Day da pynman da ka District Tuberculosis Control Society, Jaiñtia Hills deilang waka Revised National Tuberculosis Control Programme (RNTCP) heiwa da sdang ya ka hei step da ka lai kjat ki khynnah skur nadooh na madan Marin Hill hadooh wa poi ha District Library Auditorium heiwa da pynman ya ka yalang heiwa ka Y.R. Mawlong, EAC West Jaiñtia Hills da man ko kam ka kongsan.
Ka Mawlong hei klam yong ka da ong ko wa hapoh ka ri India kiwa em kjut TB toh kiwa boon dooh hapoh pyrthai tangwa deiwa pynkrehkaam ya ka RNTCP kamwa 35 lak ngut ki bru da ye u pynchait wei kiwa khlaad naka TB da hiar naka 29 lak cha ka 4 lak.
Da ong ko leh wa kam ka imlang sahlang ym toh u kyntait i ya kiwa kjut TB heiwa da khana ko wa ha Shillong da em kawi kawa pynkut yei mynsien yong ka neidaw wa da ieh lut ki lok ki jor yong ka wei i kjut TB lada dih dawai tista toh iwa ye u pynchait.
Kamtæ kam ki bru samen leh ye i u man kiwa yahkhmat wow yaleh pyrchah ya ka kjut TB deiwa kyrchaan ya kiwa em kjut TB kamjooh wow pynchlur ya ki wow li thooh dawai ki.
Ka Dr. E.B.V. Laloo, District Tuberculosis Office cum Member, Secretary DTCS, Jaiñtia Hills District da pyntip ko wa ha u snem 2017 hapoh waroh kawi ka District da em kamwa 176 ngut kiwa em kjut TB kiwa chem lyngba ka New Spear Positive wei kamwa 81% na kini toh kiwa da ye pynchait.
Ka Dr. J.N. Shullai, Director MSCWA won da klam ko chaphang ka TB wa kiwa em HIV heiwa da ong ko wa u khniang HIV pynlut u yei bor i doh wow leh pyrchah ya kiwi ki jait kjut kamtæ kiwa em HIV leh suk ki u yoh TB kamtæ ya kiwa em HIV ym jooh dam u phah ya ki wow leh ya ki Test boi toh em TB ki.
Ha kani ka sngi leh da yoh ya i klam na kawi na kawa da chait na i kjut TB ka Yoowanka Lyngdoh kawa da e khublei ya ki doctor yeiwa e ki yei kyrchaan wa i maya kamjooh ya ka bei yong ka deiwa ong wa em ki por ym kwah de ko u im tangwa i kyrchaan yong ki da ye ko u yaleh hadooh wa chait.
Ha kani ka sngi da pynkup burom leh ya ki Doctor, Lab Technician, ki Asha wa kiwi kiwi de kiwa krehchitom wow pynwiar ya ka kjut TB.
Kini kynthup ki ya u:
Dr. Arvind Khonglah u M&HO ka Padu Dispensary, ka Dr. Ritreki Toi ka M&HO Sutnga CHC, u Dr. C.R. Lamare u Doctor samen uwa chem ya kiwa boon wa em kjut TB, u Orence Myrchiang- Lab Technician, Nongtalang CHC, ka Wanri Sutnga-Lab Technician, Khliehriat CHC, ka Mandakini F Tariang kawa yoh ya i naam Best Treatment Supporter, Chutwakhu Urban Centre, u Eladmi Tariang leh uwa yoh ya ka Best Treatment Supporter, u Issaia Muksor na Nartiang PHC, ka Rani Shylla kawa kreh kam ka ASHA ha Khliehtyrshi PHC wa ka Victoria Kyndait ka ASHA ka Iongkaluh Sub-Centre Pamrapaithlu PHC.
Ha kani ka sngi leh da pynman ya ka yakop Slogan Writing heiwa ka Tome Memorial Secondary School, Jowai da yoh nyngkong ko, wa ar ka St. Mary Mazzarello Girls HS School wa le da yoh ka Marian Hill HS School.
Discussion about this post