Katkam ka khubor wa da pynmih da ka IFP, da ong wa hadien wa lai kiwa thoh khubor yong ka cha i thaw wa jia i chah siat ki chipai ka Assam Rifles wa kynthup ya u Commanding Office ka 46 AR heiwa da yap lang ka kurim wa u khon u ha ini i jia heiwa waroh kiwa da yap da em ki 7 ngut iwa da jia hajan i chnong Behiang T wa em hapoh ka Churachandpur District, Manipur wa em hajan u pood waka ri Myanmar heiwa ka PLA waka MNPF da kitkhlieh ki wa da emkti ki wow sait ya ki kari ki chipai ka Assam Rifles heiwa da mynsoo leh 6 ngut.
Ha ini i thaw katkam ki dak ki chin wa em, da antaad wa da pynemkaam kamwa 7 tylli ki Bomb IED kiwa da booh harood sarok yow pynkulmar ya ki chipai chwa wow sdang i yasiat iwa suba toh iwa siat pynhajan.
Waroh da em 5 tylli ki kari wa kynthup ya ka Bolero wa em u CO Viplav Tripathi wei da em chwa kawi ka kari wa em hakhmat wa kiwi nadien. Ka Bolero da chah siat ko palat 85 tylli ki kuli katwa sa kawi ka kari da toh ko 46 kuli. Ka kari wa nakhmat dooh da toh ko 10 kuli. Da pynemkaam leh ya ki Grenade Launcher heiwa da chem ya 6 tylli ki tadong wa da dep pynemkaam.
U DIG ka 27th Sector Brig Ashis Rangan leh da lai u cha ini i thaw pyn ha ka sngi Bibar deilang wa ki bru wa chemphang ha kini ki kaam.
Ki pulit da ong ki wa ki chipai ka Assam Rifles leh da siat kylla ki neibhah da chem ya 4 tylli ki tadong kuli (Magazine) wa da lut wa chem na ini i thaw heiwa da suba wa ki dkhot ka PLA wa MNPF leh da mynsoo ki neibhah wa da chem yei snam na ini i thaw wa yut ki.
Dei pait yei rukom toh kuli ki kari, kiwa siat da em ki neiliang timun u sarok tangwa ki kuli wa toh ki kari nakhmat wa nadien pynyoo wa kiwa siat da mih ki leh ha sarok.
Kiwa chong chnong da khana ki wa ha ka 13 tarik heipor kamwa 10:00 waje i step da sñiaw ki wa em i pdung iwa pynbood sa i yasiat heiwa ki da yut rieh ki chapoh yung wa cha ki kpær yong ki.
