Haka rynsan yakob pynyoo dohksah kawa tip kam ka Mr. Ironman Amateur Championship 2023 wa pynman daka Jaiñtia Body Building & Fitness Association (JBB&FA) hei janmiet ka 2 tarik uni u bnai ha District Library Auditorium, Jowai da wan 85 ngut ki wow yaknieh yei naam Mr. Ironman Amateur kawa da yabhah haka kyrdan Men’s Body Building, Men’s Physique, Women’s Fitness wa Denim Jeans Model.
Ka Jaiñtia Body Building & Fitness Association toh kawa da yoh i tipmit naka Meghalaya Body Building & Fitness Association, naka World Fitness Federation India wei ya kani ka rynsan ha uni u snem da tip kam ka “3rd All Meghalaya Amateur Body Building Championship”.
Ha ka kyrdan yakob wa tip kam ka Denim Jeans Model waka Women’s Fitness da pynman chi kylla wei da jied syndon ya kiwa jop.
Ha ka Denim Jeans Model da jop u Richard Wahlang naka Body Zoo Gym, Shillong katwa ha ka Women’s Fitness da jop ka Whitney Mawphlang naka Genfit Gym.
Ya ka kyrdan Men’s Physique da yabhah ka ha ka 5.5 Below waka 5.5 Above wei kiwa poi chakhmat na kini ki ar kyrdan da chimbynta won ki ha ka yakob hei joohlang yow jied ya uwa jop heiwa u Pynioladmiki Pala uwa jop naka 5.5 Below da yoh u yei naam Overall Winner ka Men’s Physique uwa yalehke ha Satar Gym Fitness Ummulong, West Jaiñtia Hills.
Ha ka Men’s Body Building da yabhah hapyrdi ka 55 Kg, 60 Kg, 65 Kg, 70 Kg Below wa 70 Kg Above wei kiwa jop na kini da lai ki chakhmat wow chimbynta wow pynyoo ksah deiwa kynthuplang na waroh i khia kilo yow jied ya uwa jop. Heini yei naam jop da rah uwa na ka 70 Kg Below, u Vijar Singh uwa yalehke ha Fittorium Gym, Shillong yow man kam u Overall Winner ka Men’s Body Building.
Kiwa jop won ha jar jiar i kyrdan khia leh da yoh ki yaka Certificate deilang waka song poisa.
Ha kani ka rynsan yakob najrong ki paidbah wa boon, da wan sakhilang leh da u Dolloi ka Elaka Jowai, u Puramon Kynjing kam u kongsan, neitæ u Chibor Najiar, Superintending Engineer PHE ka sorkar Meghalaya kam u symbood kongsan, u Lamphrang Pohktai, waheh chnong ka Mynthong, u Rikut Pareiñ, President warim ka JSU wa kiwi de kiwa chah khut sñiawbha.
U Puramon Kynjing hawa e yei klam ong u toh u sñiawngooh sñiawburom yei rynyeiñ wa da e u Blai, wei chisien pyrkhat sñiaw kam wym em myntoi ka rynsan pynyoo dohksah, tangwa lyngba i chimbynta man haroh ki kam kiwa sikai, kiwa e mynsien wei kiwa pynemkaam hok hei rynyieñ i sap wa e u Blai.
Kani ka yakob man haroh ko ka bynta u chdooh u yahluti ya ki khynroo khyllood haka luti i doh i pran wa chait wa khlan, wei neibynta i jabieñ leh yow krai i bor pyrkhat pyrdaiñ, neibhah khlem i pran wa chait, i jabieñ man i iwa thylli, i mynsien wa chong hei rynyieñ leh man i iwa yap.
Discussion about this post