Shillong: Ka North Eastern Hill University (NEHU) ynne ka sngi da pynman ko ya ka XXV Convocation Ceremony ha Convocation Hall kani ka skurbah.
U lat ka jylla u Tathagata Roy da wan u kam u kongsan wei da emlang leh u montri rangbah u Conrad K. Sangma kam u symbood kongsan.
U lat hei klam yong oo da pynchlur u ya kiwa puræ wymhoi u mylliñ ya ki thong yong ki kiwa da booh ki yow poi cha i thong wow jop hei rukom im yong ki.
“I por khynroo toh ki por wa wai boon ki laad ha ka luti wa lai lada man ko kawa kylleiñ wa khim namo kawa bait wei kattu hadien wa mih noh phi na ka dwar kani ka thaw puræ ham wiar luti wei wow kynmoo ya ka thong yong phi,” da ong u.
Da e khublei u leh ya waroh kiwa da pyndep ya ka puræ puthi yong ki wei da pynchlur u leh ya ki wow pynemkaam yei sap yong ki yow pynku ya ka imlang sahlang.
Neiliang u Conrad Sangma won da kyntu u ya kini ki khynroo khyllood wow pynemkaam yei bor yong ki ha ki kaam wa bha yow pynku ya ka jylla wa ka ri hi waroh kawi.
“Ka ri yong i toh kawa dang khynroo hapoh pyrthai wei i bor yong ka toh em ki ha ki kti ki khynroo khyllood kamtæ emkaam wow pynemkaam hok ya ini i bor yow wanrah ya i kylla wa bha,” da ong u Conrad.
Da ong u leh wa emkaam u man ki bru wa seiñ khih kiwa e kreh ymtoh u thooh kreh heiwa u pynmih kreh man ko kawa eh ya waroh ki sorkar wei lada em kiwa ye u seiñ khih kiwa jop u yah ko ya ka ri wa ka jylla cha khmat.
Ha kani ka sngi ya ki ktien pdiang burom da yoh na u Professor S.K. Srivastava, Vice-Chancellor NEHU wei da emlang leh u Professor H. Lamin, Pro Vice-Chancellor NEHU, Shillong, Professor G. Singaiah, Pro Vice Chancellor NEHU Tura, kiwa sikai kani ka skurbah wa kiwa lai puræ wa ki bei ki pa yong ki.
Waroh 8653 ngut da yoh ki ya ki Degree yong ki ha kani ka XXV Convocation ka NEHU.
Discussion about this post