87.10% ka Pass Percentage ka SSLC ka MBOSE | Tam ka West Jaiñtia deiwa yoh 96.03%

Uni u snem da man ko ka wow sahkynmoo ya ka Meghalaya Board of School Education (MBOSE) heiwa nadooh wa sdang ya ka ha u 1973, ha uni u snem 2025 ka Pass Percentage kiwa yaleh ya ka Secondary School Leaving Certificate (SSLC) Examination dapoi ko 87.10% iwa man leh iwa heh dooh.

Hawa nujor ha ki 10 snem wa da lai ha u 2015 (53.11%), 2016 (54.1%), 2017 (54.04%), 2018 (56.76%), 2019 (55.72%), 2020 (50.31%), 2021 (52.90%), 2022 (56.96%), 2023 (51.93%), 2024 (55.80%).

Ha uni u snem waroh kiwa yaleh ya kani ka Exam da em ki 63,682 ngut heiwa kiwa Pass da em ki 55,473 ngut wei na kini ki wa Pass ha ki 6 Subject da em ki 36,570 ngut katwa kiwa Pass ha ki 5 Subject da em ki 18,903 ngut.

Kiwa man kam ki ST da em 24,402 ngut ki chynrang wa yaleh heiwa kiwa Pass da em ki 21,033 ngut iwa mut 86.19% katwa ki kynthai won da em ki 35,463 ngut kiwa yaleh wei kiwa Pass da em ki 30,942 ngut iwa man 87.25%.

Related posts

Maham ka Dorbar Chnong Pamra Kmai ya kiwa leh pynsih ya u moopood ka khloo chnong

April 5, 2025

Da pynbna ya ka Result ka Written Exam kiwa yaleh kreh Grade 4 ka DSC

April 5, 2025

Hawa pait won da ki District kawa heh dooh ka Pass Percentage toh ka West Jaiñtia Hills kawa da yoh 96.03% heiwa kiwa yaleh da em ki 5065 ngut wei kiwa Pass won da em ki 4864 ngut. Ka East Jaiñtia Hills won da em 2568 ngut kiwa yaleh wei kiwa Pass da em ki 2373 ngut iwa mut ka Pass Percentage man ko 92.40%.

Ha uni u snem ki District ka Garo Hills leh da lehbha ki heiwa ka South Garo Hills kawa jooh em cha tre dooh da ku ka Pass Percentage ko cha ka 88.32% deiwa em 3298 ngut kiwa yaleh wei kiwa Pass da em ki 2913 ngut.

Kiwa boon dooh kiwa yaleh ya kani ka Exam toh ha East Khasi Hills wa em 15,656 ngut wei pynbood sa ka West Garo Hills wa em 11,943 ngut heiwa ka Pass Percentage ka East Khasi Hills man ko 92.54% katwa ka West Garo Hills won 80.50%.

Ha uni u snem kiwa yoh Top 20 leh da boon bha ki deiwa em ki 85 ngut (ynnin u snem da em 37 ngut) kiwa wan na ki skur wa em cha sor wa cha palatsor deiwa em leh 341 tylli ki skur kiwa yoh 100% ka Pass Percentage katwa ynnin u snem da em 180 tylli ki skur wa yoh yeini.

Neiliang u Executive Chairman ka MBOSE, u CP Marak ong u wa ini waroh toh dei kreh chitom ki khynnah wei da pynthymme leh yei rukom e yukylli (Question Pattern) wei i wanrah ya ka CM IMPACT Guidebook leh man ko kawa da yarap bha ya ki khynnah khamtam kitu ki wym biang bha ki Notes.