Ka Hynniewtrep Youth Council (HYC) da kyntu ko yaka sorkar wow pynkrehkaam pura yaka aiñ Prevention of Illicit Traffic in Narcotic Drugs and Psychotropic Substances (PITNDPS) Act, neibynta wow pynchitom pynsaja ya kitu kiwa myllien wow leh ya ki kam khayi drugs boonsien.
Neiliang ka HYC da yachem ko ya u Montri wa pait yaka chnat Social Welfare ka jylla, u Paul Lyngdoh ynnin ka sngi heiwa da booh yei dawa wa emkaam wow pynchitom ya ki bru kiwa emkti ha ki kaam khayi drugs.
U President ka HYC, u Roykupar Synrem da khana u wa katkam wa da pyntip u Montri, ki pulit da phah ki yei pyrtuid yong hadooh 9 ngut kiwa khayi drug kiwa da chah kem palat ar sien næ kiwa da myllien wow khayi drugs, wei i pyrtuid kini ki bru daw bichaar da ka Advisory Board yow pynngat hapoh ka aiñ PITNDPC Act, yow kset patok ya ki hadooh 3 snem khlem da yoh jamin.
Neiliang ka HYC da pynsñiaw ko wa ym toh du ya kini ki 9 ngut kiwa myllien wow khayi man-i-por yei drugs, wei ka seiñ kwah ko wow pynngat ha kani ka jooh ka aiñ ya kiwi leh kiwa myllien u khayi drugs neibhah hadooh katni ym pu em kiwa chah pynchitom deiwa khor hapoh ka aiñ PITSNDPS Act wa da pynkrehkaam nadooh u snem 1988.
Ha iwi won i liang, uwa yahkhmat ka HYC da dawa u leh na u Montri wa ka sorkar u thung noh ko da ki Fast Track Court yow pynsmat yei bichaar ya ki bru kiwa chah kem ha ki kaam khayi drug, neibhah kamwa man katni yei bichaar da leh bait da ki District & Session Judge kiwa da khia chwa i kaam iwa da pynman yei bichaar wa chimpor.
Discussion about this post