Ka thaw sumaar, Woodland WK Hospital, Sabahmuswang kam chibynta wow lehwarom ya ka sngi wa kyrpang ki khynnah, ha kani ka 13 tarik da pynman ko ya ka Pre-Children’s Day Awareness-cum-Health Camp hapoh i yahkhmat u Dr. WK Kharshiing.
Hajrong kani ka Camp da em leh ka pynsñiawthooh cha ki manbei manpa hajrong i chait i khiah ya iwa da yahkhmat da ka Sr. Ibadahunlang Dhar kawa man kam ka Nursing Superintendent yong kani ka Hospital.
U Dr. J. Hazarika uwa man kam u Medical Superintendent ka Hospital da kyntu u wow pynjanai ya ki thaw sumaar ha ka thaaiñ khamtam neibynta ki khynnah.
Da ong u wa kani toh ka sien wa nyngkong wa da pynman ka Woodland WK Hospital Jowai ya kam kani ka Camp heiwa neini chaphrang leh daw pynman chooh ya kam kani ka rukom e sumaar.
U Dr. Peter Daniel, Consultant Pediatric Surgeon da klam u hajrong i chait wa i duna ha i doh i pran yong ki ya iwa ye u sumaar pynmiat deiwa pooid (Surgery).
Neiliang ka Dr. Iman Chyrmang, Medical Officer da kyntu ko ya ki bei ki pa wow pyntikna wa sumaar bha ki ya ki khon yong ki dei langær.
Ha kani ka Camp da yoh myntoi hadooh 96 ngut ki khymnah ya kiwa da wanlang chirup wa ki bei ki pa yong ki wei da saam leh ya ki song baam kam chibynta yong ka lehkmen Children’s Day.
