Ynne ka sngi hawa yaklam wa u DC ka West Jaiñtia Hills, u Garod LNS Dykes da ong u wa katkam wa man hadooh ynnin du hapoh ka Darrang Cluster, na ki 571 ngut kiwa da Test, 96 ngut toh kiwa dang chah ktah ha u COVID-19.
Da pyntip u wa na kini ki 96 ngut, em 2 ngut kiwa dang chah sumaar ha MCH, Jowai wei uwi won wa da chah sumaar ha Shillong katwa kiwa tam won da chong kset ki ha yung (Home Isolation).
Heiyatoh wa i dawa wa i artatien ki paidbah ka thaaiñ wa da pynman Containment Area heiwa da kynthup ya kiwi ki chnong kiwa ym em u chah ktah, neiliang u DC da ong u wa ki chnong ha ka thaaiñ man ki kiwa yajan iwi ya iwi katwa kamtæ da emkaam wow leh da ka Large Containment wei ymye wow leh da ka Micro Containment.
Chooh chooh heiyatoh wa i dawa ki Dorbar Chnong wa ki seiñbhalang wow khang noh yei khayi pateiñ na Tamabil Dawki, neiliang u Garod da ong u wa ini ym chong i ha i bor ka District tangwa i rai toh na ka sorkar pyrdi, da pynrap u leh wa katkam ka hukum wa da pynmih, ki truck wa ki kari heh waroh ymtoh u sangeh ki ha sarok wei toh u lai bait ki.
Chooh chooh da pyntip u wa ha Nartiang Cluster hadooh ynnin dang em 7 ngut kiwa dang chah ktah (Active Case) ha u COVID-19.
