Shillong: U Montri Rangbah ka jylla, u Conrad K Sangma da pyntip u wa nadooh ka 19 hadooh ka 21 tarik uni u bnai da em kamwa 1787 ngut kiwa da chah ktah na i joor slapbah ha waroh kawi ka jylla, i chah ktah man ko leh ya kamwa 524 tylli ki manyung wa 85 tylli ki chnong. Da ong u wa ka sorkar dang yang chooh chooh ko leh ya ki yutip wa rap bniah na ki bor pynlai district, wei hadooh kattæ, ka sorkar ym pu yoh yutip ko lada em i dooh yei mynsien bru.
Da ong wa ka sorkar da booh ko leh yaki Relief Camp neibynta ki bru kiwa da chah chah ktah nei joor u slap waka lær ha kini ki kajiak sngi wa da dep. Da ong u leh wa i chah ktah toh kam ki chah rah ki sarok, i chah pyn-oor ki yung ki sem, ki thaw rep wa kiwi kiwi.
Da pyntip u leh wa ki District kiwa da chah ktah joor bha ha kini ki bor ka rymaw toh ha West Jaiñtia Hills waka West Garo Hills District, deiwa pynrap wa neiliang ka sorkar leh da phah ko ya waroh ki Deputy Commissioner ha ki District wow man kiwa paitbniah, neibhah wa katkam wa batai ka chnat India Meteorological Department u slap daw em u sa ha kini ki 2 sngi wow wan.
Hawa kylli, u Montri Rangbah da pyntip u wa ka jylla da yoh ko naka sorkar pyrdi lyngba ka State Disaster Response Fund (SDRF) T.33 klur neibynta wow yarap ya kiwa emkaam jhan, wei neiliang ka sorkar jylla leh da mang ko cha waroh ki District lyngba ki Deputy Commissioner T.25 lak neibynta ki yarap wa jhan.
Discussion about this post