Jowai: U sarok National Highway 40 (E) Jowai-Dawki ha ki bynta wa nadooh yingkeiñ Treiongriang Jowai hadooh laad Mustem toh u sarok uwa da boon boon snem wym em de i pynchna deiwa paka lait noh du i pyndap moo, i pyndap khyndaw wei psiang malu mala, wot hei pait da yoo wa u surok da emkaam bha wow pynchna deiwa toh rukom nadooh i siang psiang neibhah wa i jæd i sih da pynjynjar ko yei lai i wan ki paidbah khamtam leh wa man u u boodlum wa pynyabi waka ri wa marjan ka Bangladesh.
Kamtæ i joor slap ha kini ki sngi wa dep da wanrah ko yei chlai um, i oor khyndaw i chah tympra ki yung ki sem, ki pynthor ki hali, ki mar rep wa kiwi ha kiwa boon ki thaw ka ri-loom Jaiñtia, da sakhi wa uni u sarok leh nang joor i pra chooh chooh u heiwa da yoo yei oor khyndaw i pai thlu wa i kaad uni u sarok.
Em ki bynta yong uni u sarok iwa da booh leh hei maa yaki kari wa lai wa wan lym man kiwa syndong bha, neibhah wa i khlan bor ka um wa dung ya uni u sarok da yoo yei kylla dur wei da man leh thij kam ka nala næ u dooid wa heh.
Neini i chah ktah uni u sarok da yoo wa em leh ki kari khian wa sahkut wei jynjar ki u lai u wan.
Discussion about this post