Jowai: Ynne ka sngi u MLA ka Raliang uwa man leh u montri ka sorkar jylla, u Comingone Ymbon hawa yaklam wa kiwa pathai khubor da ong u wa ka West Jaiñtia Hills da chah ktah bha ko ha u slap ha kini ki sngi wa dadep.
Da ong u wa ha ka 26 tarik mar ya jia i oor sarok ha ka thaaiñ wa i chah kah luti ki sarok da phah ya ki pooh chi-loom wow pynkhooid ya ki sarok. Da pynrap u leh wa ynne da lai u chirup wa u Secretary ka PWD wow lai pait ya ki thaw wa oor khnang wow ye u leh yeiwa emkaam.
Heiyatoh won wa ki yung wa da chah khyndang kiwa da chah ktah da ong u wa da phah u ya u BDO ka Laskein Block wow e yarap ya ki lyngba ka Housing Scheme kawa dang sah nadooh ki snem wa dadep.
Chooh chooh da pyntip u wa da yaklam u wa u montri rangbah wa u symbood montri rangbah ka jylla wei da phah ya ki sahep wow pynkhreh ya ka bui (Report & Assessment) wei ha kani ka tayaw wow wan daw chong pyrkhat kammon wow chna pynmiat biang (Restore) yeiwa da chah ktah ha u slap ha kini ki sngi wa dadep.
Hajrong i chah ktah ki hali nei chlai um da pyntip u wa da phah ya ki sahep wa ki Gram Sevak wow lai pait ki yeiwa chah ktah ki hali wei wow ye u e yarap ya ki katwa ye.
Discussion about this post