Shillong: Ka sorkar jylla ynne ka sngi da rai ko wow booh noh da ki kyndon ya waroh ki skur ki bru samen (Private School) kiwa kwah ya i yarap na ka sorkar, wei lada ki skur ym ye ki wow bood yaki kyndon ym yoh ki yei yarap naka sorkar.
Hawa klam hadien wa wai ka yalang yong ki montri, u montri wa pait yaka puræ puthi ha ka jylla u Lahkmen Rymbui, da ong u wa waroh chi kattu ym em iwon iwon i kyndon ya kitu kiwa seiñ ya ki skur, tangwa katkam ki kyndon wa da booh da ka sorkar kattæ daw ye u bichaar ha iwon i rukom ki skur u yoh yarap ki naka sorkar.
Katkam wa pyntip u Rymbui, iwi na ki kyndon toh wa ki skur ha ki thaw sor toh u em ki ha i thaw wa heh 2.5 Acre katwa ha ki thaw nongkyndong toh u em 3.5 Acre, nalor itæ kiwa sikai hap ki wow pyndep ya ki kyrdan katkam wa phah na ka National Council for Teacher Education (NCTE) næ kiwi iwa phah na ki bor wa haneiñ wei kamjooh kiwa pynlai skur toh u pynyang chwa ki kammon la kammon 3 bnai ka tulop wow su ya kiwa shikai, nalor itæ ki skur toh u em ki yaka Teacher’s Welfare Fund.
Da ong chooh chooh wa ki skur ye ki wow yoh yei tipmit du deiwa yoh yaka No Objection Certificate na ki Deputy Commissioner næ ki Superintendent of Police, kawa pynsakhiat wa ki skur man ki kiwa biang wei ym em i maa yaki khynnah puræ.
U Rymbui da ong u leh wa ki skur toh u em ki yaki Committee wa kyrpang kiwa pait yei lai bait ki skur wa ki rukom sikai leh toh u man iwa paka ya ki khynnah katkam wa da phah da ka Meghalaya School Improvement Program.
Discussion about this post