Jowai: Kam chibynta wow yada nei poor ka khlam COVID-19 hapoh West Jaiñtia Hills District wa haka jylla Meghalaya wei yow bood yaki kyndon wa pynmih daka sorkar Meghalaya lyngba ka Health & Family Welfare Department, u District Magistrate, West Jaintia Hills District, Jowai da pynmih hukum u ynne ka sngi ka 31 tarik hapoh ka Section 144 Cr. P.C. deilang waka Regulation 3 ka Meghalaya Epidemic Diseases, COVID-19 Regulations 2020; da khang hapoh ka District waroh kawi nadooh ka 1st June, 2020 hadooh wa pynmih hukum da kamwai nadooh 5:00 waje i step hadooh 9:00 waje i miet man ka sngi wow yalang palat 4 ngut ki bru haki thaw paidbah palat cha baar ki yung samen ki bru. Da khang leh wow pynkrehkaam yaki kari kamai ki kari ki bru samen lait noh kiwa da chah katkam ki kyndon wa da booh kamjooh ki yaw ki hat, ki Malls, Restaurants, ki dukan cha, ki Hotel waki yalang niam.
Da khang leh yei lai na kawi ka District cha kawi kamjooh cha kiwi ki jylla. Da khang leh wow wai yaki thaw uiñke suwari, ki Gym waki madan yalehke.
Da khang leh wow pynyap yaki doh um wei wow e bih yaki um ki wah.
Kani ka hukum ym khang ko ya ki thaw sumaar kam yaki Out-Patient Departments (OPDs) waki Medical Clinics deiwa bood yaki kyndon ka Social Distancing wa kiwi ki kyndon yada. Ym khang ko ya kiwa em haki kaam chipai, ki Medical Team wa em duty, Wholesale & Retail Pharmacy, ki Police & Armed Forces, Fire & Emergency Service, MeECL & Power Grid, Food & Civil Supplies Department wa FCI, Jowai Municipal Board, Telecom, Communications & IT Services, ki Common Service Centre (CSC), ki wakreh Print and Electronic Media, ki wakreh sorkar wa em hei kaam wa da booh, ki Bank wa Treasury, ka chnat PHE, AH&Veterinary, Agriculture & Horticulture, C&RD waka Meghalaya State Pollution Control Board (MSPCB). Kiwa chong chnong kiwa da heh rta kiwa da em 60 snem chaneiñ ym emkaam ki yaka Pass lane ki Curfew Pass. Hap ki wow rah yaki Photo ID Card yong ki wow pynsakhiat ya i snem yong ki.
Kani ka hukum ym khang ko yei wai ki dukan Fair Price Shops hapoh NFSA wa NON-NFSA wei u wai ki nadooh ka 1st June, 2020 nadooh 9:00 waje i step hadooh 6:00 waje i miet. I lai i wan yong kini waroh toh kiwa em yaki CAR PASS deiwa pyntip chwa cha ka Chief Executive Officer, Jowai Municipal Board, Additional Deputy Commissioner, In-charge Amlarem (Civil) Sub-Division, Amlarem, ki Block Development Officers C&RD Block Thadlaskein wa Laskein Blocks. I lai Inter-District u chah ya kitu kiwa em yaka Inter District Transit Pass deiwa yoh bor na u Deputy Commissioner kamjooh wow lai cha kiwi ki jylla kiwa emkaam yaka Transit Pass wa da e da u Deputy Commissioner, Jowai.
Heiyatoh won wa i wai ki dukan haki thaw wa em hapoh ki chnong ki thaw kiwa da jied daki waheh chnong. Kiwa dai yonglang (Wholesale) u wai ki haka sngi Tuesday, Thursday wa Friday nadooh 9:00 AM hadooh 6:00 PM katwa ki dukan wa dai khutia (Retail) u wai ki haka Monday, Wednesday wa Saturday nadooh 9:00 AM hadooh 6:00 PM.
Kiwi kiwa de ki kaam kiwa da chah kam ki Courier Services kiwa dai yaki mar wa emkaam (Essential Goods), ki E-Commerce (Essential Goods), wa kiwi ki kaam wa leh daki bru samen kam ki Electrician, IT Repair, Plumbers, Motor Mechanics, waki mistri u ye ki wow leh yaki kaam yong ki haki thaw wa krehkaam kam ki kam haki yung yong ki kamjooh haki Workshop.
Kiwi ki kaam kiwa da chah kam ki thaw chna kari, i wai ki dukan Hardware, ki dukan dai tiar bordiñ, kiwa chna mobile, computer u pteiñ ki kamwa jooh wa kynthup ya kiwi ki jait kaam wada chah chwa wa kynthup leh yaka yaw Lay-bye Market wa em ha Ialong.
Ki dukan dai tim (Teer Counter) kiwa da jied da ki waheh chnong u wai ki haka sngi Monday, Wednesday wa Saturday nadooh 9:00 AM hadooh 6:00 PM.
Kiwa chna yaki tiar wa pynemkaam ha yung chet-ja waki Travel Agency u chah u wai ki haka sngi Tuesday, Thursday wa Friday hadooh 9.00 AM hadooh 6.00 PM, tangwa ki tre dukan u chah u pynemkaam ki du 50% ki wakreh yong ki.
Da chah leh wow pynman yaki yalehke kiwa ym ya tyngkhooh para bru kam ka Badminton, Table Tennis wei wow siat tim. I krehkaam won ki yung krehkaam ki bru samen (Private Office Establishments) u chah deiwa pynemkaam du 33% ki wakreh.
I mih i lai ki kari kamai wa ki kari samen leh man ki kamjooh kamwa da pynbait chwa.
Discussion about this post