Hadien ar bnai wa da khang yaki lieñsuiñ wa kit bru wow hær ki hapoh ka ri kiwa da chah biang u sdang ki haka 25 tarik u bnai wa dep hapyrdi ka khlam COVID-19 iwa da wanrah leh yei yarap ya kiwa pynlai lieñsuiñ kiwa da chah ktah bha naka Lockdown kawa sdang nadooh Wisu 25 tarik.
Ki jylla da pynbna ki leh yaki jar jiar ki kyndon ya kiwa lai luti nadooh wa poi ki hapoh Airport. Em ki jylla da phah ki ya waroh kiwa lai luti wow leh ki yaka Quarantine haki thaw wada pynkhreh daka sorkar.
Neiliang u Airport Director, Umroi Airport, u Manish Kumar Agrawal, da pyntip u wa kiwa lai luti hap ki wow bood yaki kyndon wa da booh daka sorkar Meghalaya deiwa pyntip leh wa ka sorkar toh kawa yarap wow pynbiang kari kamjooh ki wakreh ka chnat i chait i khiah yaka Airport nadooh nachwa ka Lockdown.
Da kyrpaad u leh naka sorkar jylla wow e biang ya i yarap yaka Airport deiwa pynbiang yaki kari wow li thooh bru kamjooh kiwa leh yaka Screening ya kiwa lai wa wan manda wai biang yaka Umroi Airport. Deiwa ong leh waka Airport toh kawa da pynkhreh wow pdiang biang ya kiwa lai luti.
U Director da ong u leh wa ym pu ye u ong deiwa tikan mynnu u hær biang ki lieñsuiñ na Umroi Airport deiwa pynrap leh wa ki wakreh ha Airport toh kiwa da dep pynsñiawthooh wei kiwa da tip bha yaki kyndon wa toh u bood, kam i wow pynduna yeiwa hap yabi para bru deiwa bood yaka Social Distancing ha waroh ki thaw nadooh wa psiah, heipor wa leh Check in, Security Check wa kiwi. Da kyrpaad u leh ya kiwa lai luti wow bood ki yaki kyndon wada pynmih daka sorkar India naki por cha ki por hawa lai luti ki lyngba kani ka Airport manda sdang biang yaka.
