Shillong: I pyllait ka sorkar wow sdang ki kreh da pynman i ya kiwa boon ki paidbah wow sñiaw laitlooid ki, tangwa heijooh i por dang em i tieñ neibhah wa hapoh ka jylla dang em kiwa chah ktah ha uni u khñiang.
Hawa yaklam wa u Conrad K Sangma uwa man leh u Montri Rangbah ka jylla ynne ka sngi, da ong u wa hanlada kiwa yoh COVID-19 ha ka jylla dang ku i, ki paidbah toh u sñiawthooh ki wa kiwa yoh ya uni u khñiang toh kiwa wan na baar.
Da ong u leh wa ki paidbah ymtoh u phylla ki wa yoh COVID-19 kiwa wan na baar, khamtam kitu kiwa chah ktah toh kiwa wan na ki Red Zone næ ki thaw wa joor wa ktah uni u khñiang.
Da ong u wa man i iwa sñiawsuk, wa ka jylla dang duna bha kiwa chah ktah bar yeiwa da mutdur, tangwa ki paidbah ymtoh u kulmar ki yeini neibhah wa ymtoh wa ye u kiar.
Heiyatoh wa da wai biang ya ki kreh ha ka jylla hadien ar bnai ka khang chong, u Conrad da ong u wa hanlada i chait i khiah man i iwa hakhmat dooh, tangwa haap leh wow pait lang yei yoh i kot, wei hadien wa ka sorkar yoo ko wa da ye u kdoh u khoom ha ki kattu katni bynta, sñiaw ko wa toh u wai ka khayi patieñ neibynta wow kyntu kynrong yei yoh i la ryngkat i syndong, neibhah ha kini ki ar bnai ki paidbah da chah ktah bha ki nei khang chnong.
