Ynne ka sngi, da wan yarap ki le ngut ki bru kiwa pawkhmat ka thaaiñ Khliehriat ya kiwa chong chnong yong ka Mukhaialong kawa em hapoh East Jaiñtia Hills District heiwa hadooh 400 tylli ki manyung da yoh yarap ki.
Ha chwa u sdang u saam ya u khoo, da yoh i ktien pdiang burom na u waheh chnong u Hundred Phawa deilang wa u secretary chnong u Tylli Sana. Da yoh leh ya i klam wa tbian na u waheh chnong ka Tuber Kmai Shnong u Jiedlang Sana hei emlang u President ka 5 Shnong u Ki Dkhar na Lumshyrmit haka yalang wa pynlai da u President VDP u Hima Sana.
Kiwa chong chnong ka Mukhaialong kiwa boon hi toh kiwa im deiwa mylla sngi, kamtæ kam ha ini i por ktah bha ko yaki paidbah yong ka chnong khamtam heiyatoh waka baam ka dih.
Kamtæ neiliang ka chnong dap ko dei mynsien wa sñiawkhia wei sñiawburom hadooh kattæ kattæ ya kini ki bru kiwa em sakhiat itæ i mynsien u yarap yaki khon yong ka chnong nadooh u Phransis Swer uwa na Khliehriat uwa man u bru uwa da yarap bait yaka chnong ha kiwon kiwon ki bynta wot ha kam ini i por waki khon ka chnong chem jingjar ki, oo ym em ieh u yaka chnong ka wym tip de dei yi u su kylliang ya oo leh.
Kamjooh neiiang yong u Wanthmu Phawa uwa na Tuber Kmai Shnong leh uwa da ya emlang bait chirup waka chnong ka thaw uwa da e sñiawbha bait lada ha iwon iwon i bynta wa emkaam ka chnong ya oo u wym jooh kyntait u wot wow chna yaki luti ki syngkieñ chapoh chnong poh thaw kamjooh wot cha ki luti lairep leh da jooh yarap u ya ki, kam ka chnong sñiaw ko wym sñiaw ye de u su kylliang ya i lehbha i yong oo leh.
Deilang wa u Hundred Phawa uwa man kam u waheh chnong yong ka chnong Mukhaialong da yarap lang u thied ya uni u khoo neibynta yong ki khon yong ka chnong uwa da ong wa nadooh wa em ka Lockdown wym tip de u thiah wei da chong pyrkhat u neibynta ki khon ka chnong wow thooh laad thooh luti u kammon u pynyoh baam pynyoh dih yaki khon ka chnong yong oo.
Ynnin ka 4 tarik won, u Wanthmu Phawa da wan yarap sñiawbha u yaki khon ka chnong Pynthorsale kawa em hapoh East Jaiñtia Hills District da u khoo cha waroh ki thlu yung kiwa em hapoh yong ka chnong hi deiwa emlang u waheh chnong u Yooki Phawa kamjooh wa u Asst. Waheh Chnong u Shaniah Phawa deilang waki dkhot chnong kamjooh da i synran lang u waheh chnong ka Tuber Kmai Shnong u Jiedlang Sana wa u Ksohlang Phawa uwa man u Chairman Seiñraij Chnong Tuber wa u Mot Phawa na Tuber Kmai Shnong.
