Jowai: Ynne 5 tarik Naiynru ka Dorbar Chnong Chilliangraij chibynta i kynmoo sngi kyrpang Bei Rymaaw nae World Environment Day da pynman ko i pynlum pynlang ya ki Plastic ki jhep wa tawah tasbah chilynter ki dieñ wa em harood ki bynta ka wah Myntdu nadooh Thwai Lahong hadooh Thwai Pohsnin kiwa em hapoh u pood u ang ka Chnong Chilliangraij.
Ha kani ka sngi da chimbyntalang da ki manbei, ki khynroo khyllood wa ki waheh wasian ka chnong wei chwa wow sdang yei kaam, da em ka yalang wa tbian heiwa da yoh yei klam i khanna pynsñiaw hajrong ka thong yong kani ka sngi na u Oriland Shylla, Assistant General Secretary Dorbar Chnong Chilliangraij.
U Oriland Shylla hei yaklam da khana u leh wa na ki snem cha ki snem da jooh pynman yei kynmoo burom ya Ka World Environment Day deiwa pynman yei thung dieñ ha ki bynta waphær yong ka chnong wei wow boodien leh u pait u sumaar ya ki dieñ wa dadep thung.
Ha uni u snem won hadien i wan ka umsoo ha ka wah Myntdu ha kini ki sngi wadep kawa darah darong ya ki jhep ki Plastic wa boonjait boonrukom, yoo wa emkaam ha kam ini i por wow pynkhooid u pynlang ya ki Plastic ki jhep kiwa tawah tasbah ha ki dieñ lynter ka wah Myntdu kiwa pynsihdur yei miat yei yirngam ka Rymaw.
