Ka Jaiñtia National Council ynnin ka 6 tarik da lai e yarap ko cha ki ar tylli ki chnong ka Shymplong waka chnong New Umtyra da u khoo, salah wei blooh.
Ha chwa wow saam yeini i e yarap ka seiñ cha kini ki ar tylli ki chnong, da pynman chwa da i yalang wa tbian heiwa da yoh yei klam na u Winchester Pala GS, JNC wa na u Rimiki Dkhar President JNC-KC.
Hadien kani ka yalang wa tbian da saam ka seiñ ya 5 kilo u khoo, 1 kilo u salah wei 1 kilo i blooh cha kawi pa kawi ka man yung kiwa em ha ka chnong Shymplong kiwa em hadooh 65 tylli ki manyung deiwa bood yaka Social Distancing wei deiwa pynemkaam leh ya ki Sanitizer da kiwa saam wei leh da kiwa pdiang ya i e yarap, heiwa ya kini ki Sanitizer da pynkhreh da ka seiñ neibynta wow yada na u khñiang COVID-19.
Ha kani hi ka jooh ka sngi da e yarap leh ka seiñ cha ka chnong New Umtyra, ha kani ka chnong da em hadooh 14 tylli ki manyung wei ya kini ki manyung leh da e yarap ha i jooh i rukom 5 kilo u khoo, 1 kilo u salah wei 1 kilo i blooh, neiliang kini ki ar tylli ki chnong da pynsñiaw ki yei sñiawngooh yeini i e yarap ka seiñ.
