Jowai: Hadien wa rai ka sorkar jylla wow sdang biang wow chah ya i khayi ha khappood waka ri Bangladesh khamtam lyngba ka Tamabil, neiliang ka seiñ Jaiñtia Students’ Union (JSU) da yieñ pyrchah yeini i thmu neidaw wa em ka khlam u COVID-19.
Hawa yaklam wa u President ka seiñ, u Lawyerson War da ong u wa ka Bangladesh man ko kawi na ki ri wa chah ktah bha ha kani ka khlam heiwa hadooh ynne ka sngi da em kamwa 71,000 ngut kiwa da yoh ya uni u khñiang wei da khlaad leh hadooh kamwa 1,000 ngut wei wa ini daw booh i hei maa ya ki paidbah wa chong chnong ha khappood lada sdang biang yei khayi pateiñ.
Da ong u wa ka sorkar da booh ko ya ki kyndon wow bood khnang wow yada na uni u khñiang wei kamwa jooh man da em da ki spah tylli ki truck wa yang wow psiah kit mar cha Bangladesh ha tymbud u sarok Amlarem-Dawki.
Kiwa yah ya kini ki truck wa kiwa yarap ya ki boonsien hiar ki na truck wow chet ja harood sarok wei heini i por da chet lang chirup wa kiwi tawon wei kam heitæ ymye wow jngai iwi na iwi namo wow leh ya katæ ka Social Distancing.
Chooh chooh da ong u wa lada ka sorkar jylla dang pynkhor ko yei lai i wan hapyrdi ki jylla namo ka Inter-State Movement, ileh won chimkhia ko wow wai ya u pood namo i khayi hapyrdi ki khappood iwa daw chah yei psiah i mih kiwa khayi na chiliang cha chiliang.
Heijooh i por da ong u wa em chiboon ki yung wa em ha khappood wei lada pynyinsur yei khayi, kini ki manyung u em ki haphrang hdooh wow chah ktah ha kani ka khlam.
Da kylli u leh wa neiyi i daw wa jhan ka sorkar wow sdang wai biang yei khayi hapyrdi ki ar ri? Yi wow bahkhlieh lada jia wa psiah uni u khñiang chapoh ki chnong wa ki jylla wa em hapoh ka jylla?
Kamtæ na kini ki daw da pyrchah joor ka seiñ ya ini u thmu ka sorkar kat wympu ye u pyntikna wow yada na uni u khñiang.
