Jowai: Ka Jaiñtia Students’ Movement (Nondhar Unit) lyngba ka chant krehkam yong ka, ka Nongdhar Unit wa haap ha ka chnong Nongdhar wa Morathut, West Jaiñtia Hills District, haka 9 tarik da hiar lai pait ki ya u Tower Mobile ka Jio wa khlem krehkaam la chi snem.
Ha ini i lai hiar ka seiñ da yahkhmat da u President ka seiñ, u Sanjone Laloo wa ki dkhot kiwa da lai pait ki ya uni u Tower hadien wa boon ki tre chnong ka thaaiñ da ujor ki wa ym myntoi i em uni u Tower uwa khlem Network.
Neiliang ka seiñ da ujor ko ha u Manager ka Jio wow pynyoh Network kattu la chibnai tangwa khlem em wa wan chna katwa kamtæ ka seiñ da ong ko wa kattu yoodur wa daw emkaam wow pynyoo dei bor.
Hajrong ini i kheiñstiñ, ka seiñ da e por ko chi tayaw ya ka Company wow chna ya u Tower wow yoh Network wei lym kamtæ ka seiñ daw looid noh ko ya uni u Tower.
Ki chnong wa da chah ktah toh nadooh ka Morathut, Nongdhar, Nongshiwiat, Nonglatem, Thadmusem, Nongkyllep wa kiwi kiwi kiwa em marjan.
Ini i kheiñstiñ toh ym du ka Jio tangwa wot ka Vodafone leh i jooh wei neliang ka seiñ ym elaad ko ya kini ki Company u kheiñ biej ki ya ki paidbah ka thaaiñ.
Kani man ko katkam ka Wyrta na u Sanjone Laloo.
