Shillong: Ka jylla Meghalaya ha kini ki kajiak sngi wa da dep da ku kiwa yoh ya u COVID-19 wei hadooh ynnin ka sngi kiwa da yoh ya uni u khñiang da em ki 44 ngut, heiwa 30 ngut toh kiwa dang chah ktah, tangwa da yoh yaka khubor kawa pynsñiawkmen wa napyrdi ki kitai ki 30 ngut, 5 ngut da chait noh ki hadien wa da dep wow Test yaki 2 sien.
Hawa klam ynne ka sngi, u Montri wa pait yaka chnat i chait i khiah ka jylla, u Alexander Laloo Hek da pyntip u wa na kini kiwa da chait, 4 ngut toh kiwa na East Khasi Hills District, katwa 1 toh na West Garo Hills District, wei wa kini, kiwa chait da poi ki cha ka 18 ngut katwa kiwa dang em ya uni u khñiang COVID-19 da em ki 25 ngut.
Da pyntip u leh wa hadooh ynne ka sngi, ki nongmuna wa da phah wow pait bniah da em ki 12,143 tylli, 11,839 tylli toh kiwa ym em chah ktah næ Negative, wei ki nongmuna wa dang yang yaka Report toh 270 tylli. Da pyntip u leh wa kiwa chong chnong kiwa da liwan na baar jylla hadooh ynne ka sngi da em ki 14,655 ngut.
U Hek da pyntip u leh wa ha ka Review Meeting wa man ynne ka sngi da yaklam ya i long i man i chait i khiah yong uwa na Umsamlem, Ri-Bhoi, wei da pyntip u wa uni man u uwa khlan hei doh i pran wei daw phah Test biang ya oo hadien 3 sngi yow tip wa lada u khñiang dang em u næ ym em de.
