Jowai: Ka Jaiñtia Hills Autonomous District Council (JHADC) haka yalang wa da e yumut wow pynman da u MLA ka 2-Jowai Constituency u Wailadmiki Shylla ha kamra krehkaam u CEM ynne ka sngi ryngkat ki dkhot ka Executive Committee ka Council, da chim ki ya ka rai wow pynkhreh ya ka bui (Presentation) heiyatoh wa ki luti wa ka Council ye ko wow leh khnang wow pynmih poisa.
Da ong wa hadien wa dadep pynkhreh ya ka Presentation daw rah ki haka Co-ordination Committee wei ha kani ka Committee daw embynta lang waroh ki dkhot ka Executive Committee ka JHADC wei daw khut leh ya waroh ki 7 ngut ki MLA ka Ri-loom Jaiñtia.
Ka thong yong kani ka Committee toh neibynta wow wanrah yei phyllu yumut hapyrdi ki MLA wa ki dkhot ka Executive Committee hajrong kani ka kaam khnang wow sñiawthooh nadooh ka sorkar jylla hadooh ka Council neibynta wow ye ko u kyrchaan pyn daka yaka hi.
“Neiliang ka Executive Committee da em chwa ko yei angnood wow wanrah tangwa yoodur wympu em cha i phyllu yumut chwa tæ da sahteiñ noh i,” da ong u CEM ka JHADC u Thombor Shiwat.
U MLA ka 2-Jowai u Wailadmiki Shylla hawa yaklam wa kiwa pathai khubor da ong u wa nachwa ka Council toh kawa khlan wow pynmih poisa tangwa kat dang lai ki por boi na ki daw wa boonjait da chitom ko wow pynmih poisa cha ka yarong ka Council hadooh wa wot ya ka tulop leh da chem chitom wow su.
Da ong u leh wa deini da kyrmen wa ka Council daw ye ko wow kyrchaan pyn daka yaka hi ym du wow chaniah na ka bhah wa toh u yoh ko. Heijooh i por da ong u wa kani ym man ko du wow pynmih poisa wow e tulop tangwa wot neibynta ka jaitbru leh kamjooh.
