Jowai: Ka Dorbar Chnong Dawki da pyrchah joor ko ya i rai ka sorkar wow wai biang ya i khayi ha khappood ha Tamabil Dawki deiwa ong wa kam ka chnong kwah ko wa ka sorkar u sangeh chwa ko yeini i thmu.
Ka Dorbar Chnong da ong ko wa katkam wa man katni ki chnong wa em ha khappood em ki hei maa khamtam ka Dawki neibhah waroh ki kari haap lai lyngba kani ka chnong.
Neiliang u Waheh Chnong ka Dawki, u Mankhraw Ryngksai da ong u wa iwi na ki daw toh wa ku ka kjut COVID-19 hapoh ka jylla wei kamjooh leh ha ka ri Bangladesh wa ka chnong Jaiñtiapur kawa jan bha wa ka Tamabil wei ka sorkar jhan ko wow wai yei khayi pateiñ.
Da pynrap u leh wa lada wai biang ya i khayi ha khappood khlem pep kani ka khlam daw poi ko chapoh ki chnong ki thaw yong i.
Da pynrap u leh wa ka Dawki man ko kawi na ki thaw wa em yaw kawa waroh ki chnong wa yajan wan yaw ki cha ka.
Neiliang ka Dorbar Chnong da thoh ko leh cha u DC ka West Jaiñtia Hills ha ka 6 tarik hajrong ini tangwa ka sorkar ym em mano ko ki, da ong u Mankhraw.
Kamtæ neiliang ka Dorbar Chnong Dawki da kyntu ko ya ka sorkar wow sangeh chwa yeini i thmu yong ka neibynta i bha i miat ki paidbah ka thaaiñ khappood.
