Shillong: Ka Khasi Students’ Union (KSU) South West Khasi Hills District, ynne ka sngi da hiar ko cha Wah Umngi kawa toh ka khyrdop yong ka South West Khasi Hills District wow pait yei wan psiah ki baar jylla, hadien wa ki bor sorkar wa ki bor District ym ye ki wow yada yaka dong ka thaaiñ hawa kam ini i por. Tangwa rap hadien ya ini, ki Magistrate wa ki bor pulit da lai ki wow hiar cha katai ka thaw deiwa thmu wow pynsangeh ya i khynra baar jylla yong ka seiñ.
I hiar yong ki dkhot ka seiñ man i hadien wa da yoo yei wym ye ki bor sorkar waki bor District wow kdooh u khoom yei psiah i mih yong ki baar jylla hapoh yong ka dong ka thaaiñ.
U President ka KSU-SWKH, u Forwardman Nongrem da ong u wa ka seiñ da yoo ko wa i wan psiah ki baar jylla nang joor i deiwa chim kabu yaka Lockdown hawa nujor waki por wa da lai, wei ini i wan psiah laitlooid yong ki baar jylla da che na ini i ye u ksoh yaki baar jylla da ki dkhot ka seiñ ha kini ki sngi waki tayaw wa da dep.
Da ong wa hanla em i pynthut na ki bor pulit wa ki bor District ynne ka sngi, tangwa neiliang ki dkhot ka seiñ da yoh ki wow pynuiñ noh yaki 4 ngut ki baar jylla wa thmu wow wan psiah hapoh yong ka District.
Da pyntip u leh wa neiliang ki bor District da khang ki yaka seiñ wow booh ya katai ka khyrdop hapoh Wah Umngi, tangwa ka seiñ da klam che ko wa ini toh i sdang wei da chim yaka rai waki dkhot yong ka seiñ na ki Unit wa Circle u sonteri ki neini chakhmat ha man ki dong waki laad yong ka Mawsynram Block wa South West Khasi Hills District.
“Phi ye phi u khang ya i wow lai chakhmat yaka Check Gate yong i tangwa kynmoo ki Check Gate yong i em hi ha man ki chnong neini chakhmat.”
Chooh chooh da pyntip u wa ka KSU da kyntait ko yei tyrwa ki bor District wow phah Volunteer haki thaw yang næ khyrdop yong ka sorkar deiwa ong wa ka seiñ daw lai hi ko i yong ka hi i luti neibhah ym em yumut ko wow yang lang katwa ki bor sorkar waki bor District ym pu ye ki wow pynkylla yaka rai wow khang chwa ya i psiah i mih ki baar jylla hapoh ka thaaiñ ha i pyrtuid yong ki “Highly Skilled Laborers”.
Da ong u leh waka seiñ daw phah ko da i thoh cha ki MLA wa MDC yong ka Mawkyrwat, Mawsynram wa Ranikor Constituency wow kyntu leh wa toh u klam ki iyi iyi hajrong ini cha ka sorkar kam kiwa mihkhmat wei ym toh u suki hi-eh ki hajrong kani ka bynta.
