Sa arngut wa yoh COVID-19 ha Sikkim, waroh da em 70 ngut

Katkam wa pyntip da u DG-Cum-Secretary Health, u Dr. Pempa T. Bhutia ka jylla Sikkim, ynne da em sa arngut kiwa yoh COVID-19.

Kini kyntup ki ya kawi ka kynthai wa 18 snem kawa liwan na Delhi haka 7 tarik uni u bnai. Da sah nyngkong ko ha i thaw leh Quarantine wa hap dei su ha Pelling West Sikkim, heiwa da pyntikna wa da yoh COVID-19 ko haka 16 tarik uni u bnai. Da kit yaka wut wut cha ka Isolation Ward, Ayush Hospital Geyzing.

Uwi won uwa yoh COVID-19 toh uwa 52 snem u chynrang uwa na Tathangchen, Gangtok. Da liwan u na Kolkata haka 14 tarik uni u bnai wei da booh ya oo ha STNM Hospital hadien wa yoh u yaki dak ki chin wa chitom u haka 15 tarik heiwa da pyntikna i Test yong oo wa da yoh COVID-19 u haka 16 tarik.

U Dr. Bhutia da pyntip u leh yeiwa em wa yap uwi u bru uwa 27 snem haka 16 tarik. Uni toh uwa liwan cha Sikkim na New Delhi haka 5 tarik uni u bnai wei da leh u yaka Quarantine ha i thaw wa hap dei su ha Gangtok. Da sdang u wow chitom (Flu) wei da Test ya oo hadien 5 sngi wa leh Quarantine u.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da leh yaka TrueNat Test wei haka 12 tarik da chem wa man Negative u. Hadien wa pteiñ bait u wow chitom, da phah Test biang haka VRD Laboratory daka RT-PCR haka 13 tarik, wei kani ka Test da chem leh wa man Negative u. Hadien ini da phah leh biang yaka RT-PCR Test haka 15 tarik wei da chem biang wa man Negative.

Hadien ini da Test boi em Tuberculosis u wei da chem wa em u yaka Tuberculosis. Hadien ini da e dawai TB ya oo wei da chah wow mih u napoh Quarantine yow pteiñ u yei dih dawai. Tangwa ha i miet ka 16 tarik da joor i chitom u wei da pynkit cha CRH, Manipal, tangwa da khlaad noh u chwa wow poi Hospital u. U Dr. Bhutia da pyntip chooh chooh u wa da phah Test biang ya uni u bru deiwa leh yaka RT-PCR wei sa chisien da chem wa da man Negative biang.

U Dr. Bhutia da pyntip u wa kattæ da em 52 ngut kiwa da booh haka Isolation Ward ka Covid-19 Hospital (STNM), 3 ngut ha Triage Facility wa 14 ngut kiwa em hapoh ka Isolation Ward ka Ayush Hospital, Geyzing. Waroh da em 69 ngut kiwa dang em haki thaw sumaar katwa kiwi won da leh ki yaka Home Quarantine.

Wa kini, waroh kiwa da yoh COVID-19 hapoh Sikkim da em ki 70 ngut, heiwa 66 ngut toh kiwa dang em ya uni u khñiang wa 4 ngut kiwa da chait.