Shillong: Hawa yaklam wa u Director ka North Eastern Indira Gandhi Regional Institute of Health & Medical Sciences (NEIGRIHMS), u Dr. P Bhattacharya da ong u wa ki bor pynlai da pynkhreh ki 55 tylli ki kamra, tangwa ym pu ye u pynemkaam lut waroh yaki kamra wa da mang, neibhah hap wow pynkhreh leh ya em kiwa wanrah ya kiwa yoh COVID-19.
U Director da ong u leh waka Hospital ym ye ko wow mynjur bait ya waroh ki dawa yong ki Nurse næ wow pynbiang yaki thaw lada sñiaw ki wa ym man lane wym ye ki u liwan cha ki yung ki sem, tangwa ye ki wow pynbiang hi yaki thaw wow sah.
Da ong wa ki bor pynlai iwa emkaam toh kammon wow sumaar ya idæ manda poi ha yung chwa wow em ki wa kiwa em ha yung, deiwa ong wa u sah Quarantine ym man ko kawa suk neibhah hap wow chah kset samen ha i jooh i kamra ym duna yaka 14 sngi. Da pyntip u leh wa em kiwa chim stiñ yaka Quarantine wei da mih ki wow lai cha ki yung ki sem naki thaw wa sah ki.
Da ong u wa ka Hospital hap ko wow pynkhreh leh ya iwa daw jia hadien habood, neibhah da pynbiang lut pynemkaam lut ya waroh ki tiar næ ki thaw sah kattæ, tangwa hadien lada wan iwon iwon i jia iwa rap heh, ym em dei iyi iyi hadooh itæ i por.
U Dr. Bhattacharya da kyntait u wa em iwon iwon i leh beiñ næ kheiñ beiñ yaki Nurse næ ki Doctor, tangwa iyi wa ki bor pynlai da leh ki toh wow sikai yaki jar jiar ki wakreh kammon wow leh næ yada wow lait na i chah ktah ha u khñiang kjut.
