Ka thap Vote wow jied MP chaka Rajya Sabha da pynman yaka ynne i step ha Legislative Assembly Building wa em ha Rilbong, Shillong heiwa da bood leh yaki kyndon wa da booh yow yada nei poor u khñiang COVID-19.
Neiliang u Montri Rangbah ka jylla da ong u wa i thap Vote man i iwa lai bait kamjooh i pynkhreh leh man i katkam ki kyndon ka Election Commission deiwa pynrap leh wa kiwa boon ki MLA wa em hapoh ka sorkar MDA da dep ki wow thap ya i Vote yong ki wei sñiawskem u wa daw yoh yei jop deiwa suk wei ya ini da yaklam leh boon sien yow pyntikna yei jop.
U kyrtong ka Congress u Kennedy Cornelius Khyriem da ong u wa ka Party yieñ pyrchah ko yaka CAA heiwa ka MP ka NPP da kyrchaan ko ya kani ka aiñ wei lada jied biang ya u MP ka NPP khlem pep oo leh daw kohngooh wei daw bood u ya iwa ong ka BJP neidaw wa man ki chi lok ha Delhi. Kamtæ da ong u waka Congress pyrchah ko ya kani ka aiñ kawa ktah yaka jaitbru, ka imlang sahlang, ka dustur riti wei chong ko ha kini ki 60 ngut ki MLA lada maya ki yaka jaitbru deiwa bood yaka Congress wa yieñ pyrchah yaki aiñ wa pyrchah yaka jaitbru. Wei yooluti u wa ki MLA kiwa em haka MDA kiwa ym toh ki yong ka NPP daw thap Vote ki cha oo.
Ya ini i jooh da pynsñiaw da u MLA ka Congress u Charles Pyngrope uwa ong wa u kyrtong toh u yong ka NPP ym toh yong ka MDA kamtæ kitu kiwi ki MLA kiwa ym toh yong ka NPP ye ki wow Vote kat chawa ngait ki.
Neiliang u MLA ka Mawphlang u SK Sunn da ong u wa u Dr. W. Kharlukhi da tikna u jop u wei kam u jaitbru Khasi ym leh u ya iwa man pyrchah yaka jaitbru uwa man leh u bru wa chemphang uwa em haka kaam puræ puthi.
Neiliang won u James Sangma da ong u wa ym em artatien u yei jop neidaw wa waroh ki MLA ka MDA ya emlang ki wei ka Congress i pyrchang yong ka toh wow pynkulmar donhi tangwa ym ktah ko iyi iyi leh.
Neiliang uwa yahkhmat ka liang pyrchah u Dr. Mukul Sangma da ong u wa daw tip manda pynbna yaka Result kiwon kiwa klam dei hok.
Kam wow pynkynmoo wa yaka Result daw pynbna myntu ka sngi hadien wa niaw Vote heipor 5 waje i janmiet.
