Jowai: Ynne i step synyaw heipor kamwa 12:30 i diñ da baam lut i ya ar tylli ki yung wa em ha dong Moowatam, Tuber Kmaichnong wei da suba wa ini i diñ da kop i neidaw wa thut ka bordiñ (Short Circuit).
Kini ki yung toh ki yong ka Diamondful Sana wa ka Beautiful Sana heiwa da mynsoo leh u payu waheh ki, u Ajol Sana uwa da mynsoo nei thut u riñ mynsien neidaw i tdem wa mih ha kamra wa thiah u wei da ye wow pynlait noh ya oo.
Ya u Ajol hadien wa ye u pynlait ya oo na i kamra thiah da pynkit cha Civil Hospital, Ialong wei dang em u hapyrdi i chah sumaar.
Ki waheh na ka chnong da pynsñiaw ki yei mynsien wa chrai neidaw wa slem ka kari tympleh-diñ u poi neibhah da poi ko heipor 1:20 i step kamwa duna chi kynta nadooh wa pyntip yeini iwa jia.
Da pyntip ki leh wa ini i thut ka bordiñ ye i wow man na u Transformer uwa da ujor ki bor chnong cha ka MeECL tangwa khlem mih soh mih sla.
Chooh chooh da pyntip ki wa hanlada pdung ki kum LPG leh ini i diñ ym em u ktah i ya ki yung wa em hajan.
Da antaad wa ha ini i jia i dooh da kynjoh i da ki phaw lak neibhah da baam lut i diñ ya ka poisa, ki kot ki ska, i ksiar wa kiwi kiwi.
